உதிர் இலை ஓசை

நீங்கள் என்னைப் பற்றி
உரையாடிக்கொண்டிருக்கும் இப்பொழுதில்
ஒரு லாரியின் முன் சக்கரம்
எனது பின்னந்தலையில்
ஏறி இறங்கிக்கொண்டிருக்கலாம்

நண்பர்களே உங்களது பேச்சின்
வேகத்தைக் கூட்டவோ குறைக்கவோ செய்யாமல்
அப்படியே தொடருங்கள்
அது போதும்

உங்கள் துரோகத்திற்கு
உங்கள் குரூரப் பரிகாசத்திற்கு
உங்கள் அவிழ்க்கப்பட்ட பசித்த மிருகத்திற்கு

இன்னொருமுறை சொல்கிறேன்
சுய மரணத்தை விட
ஒரு கேடுகெட்டச் செயல்
வேறொன்றும் இருப்பதாய் இல்லை
உங்களது பெரு உலகத்தில்