இலையுதிர் காலம் ...

ஆகையால் காதல் செய்வோம்

2012-01-24T18:57:00.000+03:00

காடென வளரும் வாதையினை

பிரசவித்துவிட்டு,

மழலைப்பேச்சு

மிகப் பிடிக்கும் என்கிறாய்

பெண்மையின் அந்தரங்கம்

புள்ளியென

கோடென

வட்டமென

விவரித்துக் கொண்டாடி, பின்

ரகசியம் அதிஅற்புதம் என்கிறாய்

பிறழ்வின் முற்றத்தில் நின்று

உரக்க கத்துகிறேன்

நீ என் தோழி..

ஆகையால்

காதல் செய்வோம் என்கிறாய்

ஓர் அபத்த பகலை

உடைத்துக்கொண்டு நகர்கிறது

எனது வானம் !

நன்றி உயிரோசை

வா..

2012-01-24T18:50:00.000+03:00

என் சிநேகிதங்களைக் குடித்துவிடும்

மதுக் குவளைகளுக்கு

எதற்கொண்டும்

தலை கவிழ்வதாய் இல்லை

வா..

சாகடிப்போம் இறந்த காலத்தை

ஓர் விரல் முத்தம் செய்து

ஓர் புன்னகை எய்து

ஓர் மௌனம் கீறி

ஓர் புணர்தலின் உச்சம் காட்டி

ஓர் அன்பின் மொழி எழுதி

வா..

கொண்டாடுவோம்

நிகழ்காலம் தூவும்

பிரியத்தின் நட்சத்திரங்களை

நிலா மழலை கொண்டு.

நன்றி உயிரோசை

உயிரோசை கவிதைகள்..

2012-01-10T15:18:00.000+03:00

நிசப்தம்

என் இரவு மிருகத்தின்
பகல் நாவினை
ருசித்து உண்கிறாய் நீ

கூரை வழி சொட்டும் மழையென
வழிந்து கொண்டிருக்கிறது துயரம்

என் ஒரு துண்டு வானத்தின்
முழு கடலையும் கைப்பற்றி விடுகிறாய் நீ

பிரிவின் சாத்தியங்கள்
இனி எந்தவொரு கோடையிலும்
நம்மில் இல்லை.

நானும் அவர்களும்

கடவுள் வருவதாகச் சொன்ன இரவில்
பால்யன் ஒருவன் மூத்திரம் பெய்கிறான்

தான்யாவின் காதுமடல் மச்சம்
எழுதப்பட்டிருந்தது முன்பொரு காலத்தே
கீதாவின் மருதாணிக் கைகளில்

நான் நானாகித் தொலைத்த தருணம்

பெரு மழை தீர்ந்த கனவில்
வயலின் மீட்டிக்கொண்டிருந்தான் கடவுள்.

நன்றி உயிரோசை

உயிரோசை கவிதைகள்..

2012-01-02T17:00:00.000+03:00

ஸ்பரிசம்

கோடையின்
செந்நிற கால்கள் அசையும்
நிலத்தில் யாதொரு பிடியுமற்று
நிற்கிறேன்,
உன் பனி கைகளைத் தந்துதவு
இப்-பிள்ளை வாழட்டும்
இன்னும் சிறிது தொலைவு.

அடையாளம்

துளி,
கடலினும் பெரிதாகையில்
சிறகை விடுத்து பறவையாகிறாய்
பின்தொடரும் அலகு அல்ல
இவ்இறகு,

நினைவின் தடயம் !

நிகழ்ந்த மரணத்தின் காரணங்களாக

1) புறக்கணிப்பின் அழியாத் தடம்

2) அவமானத்தின் அந்திமம்

3) இழப்பின் பெரு ரணம்

கடவுளெனும் பெயரில் சாத்தான்
சாத்தானெனும் பெயரில் கடவுள்

எப்படியும் நிகழலாம்
எப்படியும் நிகழ்த்தப்படலாம்
இறப்பு.

நன்றி உயிரோசை..

தாகம்

2011-12-31T16:54:00.001+03:00

அலைகடலில் மிதக்கும்
நிலவின் வெள்ளொளியில் முகம் காணும்
இரவை கடத்தி படுக்கையில் உலர்த்துவதாய்
கண்ட அந்த அபத்தக் கனவை
சாமத்தின் வாசலில் குரைக்கும்
தெருநாயின் காது திருகி சொல்கிறேன்.

பின்
பின் மதியப் பூனையாய்
அவள் முலையருந்த,
வேட்கை கனலின் விரல்கள் மீது
திரும்புகிறேன்.

கொலுசு கால்களின்
இசை வழியே நிரம்புகிறது
அன்பின் ஊற்று.

மழை இரவில்

2011-12-27T07:47:00.000+03:00

மழையோய்ந்த முன் இரவின்
விடியலில்
சொட்டிக்கொண்டிருக்கும் துளிகளென
வசீகரிக்கிறாய்.

தெளிந்த நீரோடையில்
ஒரு இலை உலவுவதைப்போல
அத்தனை அழகியலாக
என்னுடல் பற்றுகிறாய்.

அன்பின் ஆயிரங்கரங்கள் கொண்டு
அத்தனை மெலிதாய் புன்னகைக்கிறாய்.

புன்னகைக்கும் போதே
இனியும் கோடை வருமென்கிறாய்.

ஒரு சிறு கைப்பிடியினைச் சுற்றும்
கொடியென தன்னை
இறுகப் பற்றிக்கொள் என்கிறாய்.

கோடையொன்றும்
அத்தனை வெம்மையோ
அத்தனை தனிமையோ அல்லவென
நம்பும்படியாகச் செய்துவிடுகிறாய்.

இன்றிரவும் மழை பொழியுமாயின்
அதனின் சில துளிகளை
உன் கைக்குட்டையில் கோர்த்து
பின் வரும் கோடையில்
உலர்த்தலாமென நிசப்தமாகிறேன்.

நன்றி உயிரோசை..

இயலாமை

2011-11-22T10:00:00.000+03:00

அன்பு ததும்ப அழைப்பதாய் அழைக்கிறாய்
வரவேற்பறையில் அமர்ந்து விவாதிப்போமென்கிறாய்
ஒரே ஒரு நாற்காலியே அங்கு போடப்பட்டிருக்கிறது
அமர்ந்து கொள்கிறாய்
குவளை நிறைய அவமானத்தை தருகிறாய்
தேநீரெனப் பருகச் சொல்லுகிறாய்
நீ மட்டுமே பேசிக்கொண்டிருகிறாய்
'ம்' சொல் என்கிறாய்
நல்லது என்கிறேன்
குரூரமாய் புன்னகைக்கிறாய்
நடந்தவைகளை மறந்து விடுமாறு கட்டளையிடுகிறாய்
நடந்து கொண்டிருப்பவைகளின் குற்றவுணர்ச்சி ஏதுமின்றி
பின் வெளியேறுமாறு உக்கிரமாய் கண்ணசைக்கிறாய்
இறைந்து கிடக்கும் அவமானத்தின் நிழலை இறுக வாரி
கழுத்து திருகி கொன்று விடலாமென குனிகிறேன்
உனது முதலாளித்துவம்
எனது முதுகில் ஓங்கி ஒரு போடு போடுகிறது.

நன்றி உயிரோசை..

திரும்புதல்

2011-11-14T17:41:00.000+03:00

உனது எல்லா விடுபடுதலிலும்
எனது பெருங்காதலே
மீச்சிறுபுள்ளியென
ஆகச்சிறந்த கவிதையொன்றை
விமரிசையாகக் கொண்டாடுகிறாள்
நம் இருவருக்குமான தோழி.

நன்றி உயிரோசை..

அவர்கள்

2011-10-24T18:42:00.000+03:00

உன் இருள் நிழலில்
மின்னிப் பறக்கிறது
என் தூய ஆவி.

இருப்பது போல்
இல்லாமலிருத்தலில்
இருந்ததை விட
அத்தனை வெளிச்சம்
அத்தனை அடர்த்தி
அத்தனை மென்மை.

கானகம் நுழைந்து
காணாமல் போவதும்
திரும்பி வருதலென்பதும்
ஒரே மாதிரியான நிகழ்வே
அல்லது
"அல்லது" அல்லதாகவே இருக்கட்டும்.

நீ சொல்வது போல்
நான் அந்நதியென
இல்லையெனினும்
நாளைய மழையின்
முதல் துளியாகவே
பிரிகிறேன்.

பச்சைப் புற்களின் நடுவே
நல்ல பாம்பொன்று
சுருண்டு கிடக்கிறது.
நான் அதை நீ என்கிறேன்.
நீ அதை நான் என்கிறாய்.

அது அதுவேயில்லை
வேறொன்றென சொல்லிப் போகிறார்கள்
கடக்கும் இவர்கள்.

நன்றி உயிரோசை..

நிலைப்பாடு

2011-09-16T09:25:00.000+03:00

சொற்களின் காட்டுக்குள்
பெருந்தீயாகப் பரவுகிறாய்
உனது இருபெனும் மாயையினை
நிலைப்படுத்த.

பின்னொரு பொழுதினில்
தனிமையின் பெருங்கடலை
ஓவியமாக்க முயற்சிக்கிறாய்
எரியும் ஒற்றை அகல் வரைந்து.

முன்னெப்பொழுதோ
பெய்யாதிருந்த மழை
ருத்ரதாண்டவமென
தீபத்தை குரூரமாக விழுங்கிப்போகும்
இவ்வேளையினில்

மேலும்
அவனைப் பற்றி விரிவாக
உரையாட ஏதுமில்லை.

நன்றி உயிரோசை..

பிறகு

2011-07-13T13:27:00.000+03:00

தற்கொலை செய்து
இரு தினங்களுக்குப் பிறகு
மிக அழகாக ஒப்பனை செய்துகொண்டு
ஒரு மெல்லிய புன்னகையோடு
வந்தமர்கிறாள் அபர்ணா.

அந்த அபத்த கனவையும்
அந்த வதையுள்ள ஏமாற்றங்களையும்
அந்த முகமூடி மனிதர்களையும்
அந்த துரோக ஊசியின் கூர்முனையையும்
அந்த நம்பிக்கையின் உடைந்த சில்லுகளையும்
அத்தனை நிதானமாகப் பேசத்துவங்குகிறாள்.

பிறகு இருவருக்குமாக
நல்ல சுவையுடைய தேநீரை
தயார் செய்கிறாள்.

நான் என் கனவின் ஓட்டைகளை
சரி செய்வது பற்றி
தீவிரமாக எண்ணத் துவங்குகிறேன்.

சலனமேதுமின்றி அவள்
என் விரல்களை கோர்த்தவாறு
தான் செத்துப் போயிருந்த தன் கனவை
சின்னச் சின்னத் துண்டுகளாக்கி
தேநீரோடு சேர்த்துப் பருகுகிறாள்.

நானும்
நானெனும் பிம்பமும்
கொஞ்சம் கொஞ்சமாக
உடைந்து சரிகிறோம்.

பெருவனம்

2011-07-04T18:54:00.000+03:00

பெய்யாத மழையின் நிலமெங்கும்
பிரிவின் வாதை
என்கிறேன் நான்.
அது
அன்பின் வதை,
பேய்மழையின் நிலமெங்கும் நீ
என்கிறாள் அவள்!

நன்றி உயிரோசை..

அரேபிய ராசாக்கள்.. 16

2011-06-27T17:52:00.000+03:00

மீளத் திமிரும் கானலென
பாலையெங்கும் தவித்தலைகிறது
நீ இட்டனுப்பிய உப்பு முத்தம் !

சொற்களின் வனம் புகுந்த
ஆகாய நேசம்
கடலின் நட்சத்திர எதிரொளிக்கான
காத்திருத்தலில் !

வாழ்வின் பெருவெளியில் சிக்கிச்
சாயும் கறுநிற நிழல்களனைத்தும்
ஜனிக்கும் மரண பிம்பங்களாகவே
மொழி பெயர்க்கப்படுகிறது..!

நன்றி உயிரோசை..

இயல்பின் நிழல்

2011-06-20T19:17:00.000+03:00

ஒரு அபரிமிதமான நம்பிக்கை
உடைபடும்போது எழும் மன அழுத்தத்தின்
நம்பகத்தன்மையை தீர்க்கமாய் அகப்படுத்தியவாறு
தொடரும் இருப்பினில்,
சட்டென நுழைகிறாய்
ஆட்காட்டி விரலளவு அன்போடு !

சற்றும் எதிர்நோக்காதிருக்கையில்
இயல்பின் நிறத்தை தெளிக்கிறாய்
இருப்பின் நிழல் எங்கும்.

சாயுங்காலத்தில் நழுவிச் செல்லும்
சூரியனின் வலங்கை பிடித்து
இரவை உதிர்க்கும் நிலவின் பெருமுகத்தில்
உன் பெயர் பதிக்க
நானோ அலைகிறேன்
இவ்வறண்ட வெளியெங்கும்.

புரிதலின் பெரிய குழப்பத்தினில்
கால் நனைத்துவிட்டு வா
விரல்களை இறுகப் பற்றிக்கொள்வோம் !

நன்றி உயிரோசை..

காதலின் வேட்கையோடு

2011-06-06T16:54:00.000+03:00

உடலிலிருந்து உதிர்ந்து விழுந்த

நிழலை இறுகப் பற்றி
மௌனம் கலைக்கிறது
முகில்களடர்ந்த இரவு..

உயர உயரப் பறக்கவிடப்பட்ட
வண்ணத்துப்பூச்சியின் வண்ணங்களை
தன்னிடத்து வைத்திருக்கும்
மெல்லிய சிறு சிறு விரல்களைப்போல,

மகிழ்வின் ஒப்பற்ற கடலில்
மெல்ல இறங்கும் இந்தப் பௌர்ணமி நிலா
ரகசியத்து இட்டுச்செல்கிறது
அன்பின் ஒப்பத்தை.!

கூட்டத்திலிருந்து
கைகள் அள்ளிய ஒற்றை நட்சத்திரம் ,
அவளுக்கென தருகிறேன்.

நிழலென உதிர்ந்தவள்
வெட்கத்தின் புதிர் புன்னகையோடு
கட்டிக்கொள்கிறாள்
இரவு நிறைய நிறைய.!

நன்றி உயிரோசை..

தோல்வியின் பெருவெளி !

2011-05-30T16:32:00.000+03:00

அச்சொல் விழுந்தொடிந்த கணம்,
நதியென அலையும் நினைவின்
பல்லக்கில் !

முன்னெப்பொழுதுமில்லா
அடங்கா வெறுமையுடன்
வறுமை படர்ந்த விழிகளென
பனித்திருக்கிறது வெளிச்சம்.

பிரிவின் உடைந்த நாற்காலியில்
இருத்தல் மெல்ல நகர்கிறது
காற்றில் ஒரு சிறு இலையினையொத்து..

என் தீக்கனவில்
அவளின் புது வீட்டை
பழைய சாக்கடைப்
பின்தொடர்வதாய்
எழுதி வைக்கிறீர்கள் என்னை..!

தோல்வியின் வெளியெங்கும்
எனது ஒற்றைக் காதல்.

நன்றி உயிரோசை..

அரேபிய ராசாக்கள்.. 15

2011-05-23T16:58:00.001+03:00

புறக்கணிப்பின் நிறங்கள்
படிந்து கிடக்கின்றன
இப்பாலையின் பெருவெளியெங்கும்
கானலைப்போல.

கதைகள் பல நிரம்பியிருக்கும்

இம்முகங்களின் பார்வை கானகத்தில்
ஒரு வயோதிகனின் இருப்பென
படர்ந்திருக்கிறது
வலியென்பது.

நிழல்கள் அனைத்தும்
மரித்த பிம்பங்களென
ஒட்டிக்கொள்கின்றன
அறையின் இரவினிடத்து..!

தெவங்கி தெவங்கி அழும்
அப்புதியவன்
அறிந்திருக்க வாய்ப்பில்லை,

நாட்கள் திங்கும்
இத்தலைகள்,
இயலாமையின் உச்சத்தில்
பிறகெப்பொழுதும்
வெறுப்பையே தன்னிடத்து
நிலைப்படுத்தியிருக்கிறதென்பதை.

நன்றி உயிரோசை..

அனகாவும் மழையும் !

2011-05-17T07:39:00.000+03:00

இந்நாட்களில்
எவருக்கும் பெய்யாத மழையை
தன் பிளாஸ்டிக் செடிகளுக்குப்
பெய் பெய்யென
அறையிலிருந்த மழை சித்திரத்தை
தட்டித் தட்டிக் கொண்டிருந்தாள் அனகா!

அலுவல் முடித்த களைப்பில்
வீடு சேர்ந்த அம்மாவின்
கைகளில் அகப்பட்ட மழை
அனகாவின் கண்களிலிருந்து
சுரந்து தரப்பட்டது!

நன்றி உயிரோசை..

அதிர்வு

2011-04-05T13:26:00.001+03:00

எறும்பு மொய்க்கும்
காலி தேநீர் டம்ளரில்
சுவை மிச்சமிருக்கிறது.

மேகத்தின் கால்களில்
ஈரம்
மழை குறிப்பெழுதுகிறது.

ஒரு கூட்ட நெரிசலில்
ஏதோவொரு அவன்
ஏதோ ஒரு அவளைத்
தேடுகிறான் அல்லது
தொலைத்துவிடுகிறான்.

தனித்துக் கிடக்கும் பாறையில்
நத்தையொன்று மெல்ல
இடம் பெயர்கிறது.

பக்கத்து காற்று
தூரத்திலேதோவொரு கிளையை
உடைத்து வந்திருக்கிறது.

சிறுவர்கள் இரண்டுபேர்
மணல்வீடு கட்டித்தீரும் தருவாயில்
தங்கைப் பாப்பாக்களை
அழைத்துக் கொண்டாடுகின்றனர்.

கடலில் அலை
இன்னும் மிச்சமிருந்தது.

நன்றி உயிரோசை..

அதற்குப் பின்னும்

2011-03-28T17:43:00.000+03:00

உன்னை அல்லது
உங்களை அறியாத
பெருநகரத்தில்
கொசு ஒன்று செத்து
இரத்தம் புறங்கையில்
வெறுமெனே காய்ந்து கொண்டிருந்தது.

மின்வெட்டின் மிச்ச இரவு
விழித்துத் தீர்ந்தது.

கார்பரேட் கம்பெனி வேலைக்கென
அடுக்குமாடிக் குடியிருப்ப்பு
விரைந்து நகர்ந்தது.

சிக்னலில்
ஒரு அரைக்குருடி
பிள்ளைக்குப் பால் கொடுத்தபடியே
யாசித்திருந்தாள்.

இரு சக்கரனொருவனின்
கெல்மெட்டில்
மற்றொரு ஈ
ஒன்றுக்குப் போனதை
தெருநாயொன்று கண்டு
வள் வள்ளென்றது.

நான் வழக்கம்போல
டீக்கடையொன்றில்
அத்தியாவசியமான
தற்கொலைச் செய்தியை
தினசரியில் சுவைத்துத் தீர்த்தேன்.

நன்றி உயிரோசை..

புறக்கணிப்பு

2011-03-15T18:26:00.000+03:00

ஒரு அற்ப தருணமென
விலகுகிறேன்
உனது பெருங்கூச்சலிடமிருந்து.

மௌனத்தின் ஆயிரங்காதுகளை
சாதுர்யமாக்கும் இருப்பிலல்ல
இந்த ஒற்றை இதயம்.

நன்றி உயிரோசை..

அறிவிப்பில்லா விடைபெறல்

2011-03-08T13:52:00.000+03:00

ஒரு இருள்சூழ்ந்த இரவில்
எஞ்சிப்போன
ஒரு கெட்ட சொப்பனம்தான்
இந்த துர்செய்தி.

அகாலத்தின் படிக்கட்டுகளிலிருந்து
மெல்ல ஊர்ந்து கொண்டிருக்கும்
அதன் சிவந்த கண்களில்
விடியலற்ற ஒரு பகல்

நகக்கண் அழுக்கைப்போல
துல்லியமாகத்
தன் இருப்பைத் தெரியப்படுத்துகிறது.

ஒரு மரணச்சம்பவத்தின்
அசை
இதனைக் குரூரமானதென்பதை
அவன்
இதற்குமுன் அறிந்திருக்கவில்லை.

ஒரு விடியலற்றப் பகலுக்காகவே
விழித்திருக்கிறான்
அவன்.

நன்றி உயிரோசை..

வனம்

2011-02-28T17:42:00.000+03:00

ஒரு பசித்த மிருகத்தை
தொட்டுத் தடவுதல்
எத்தனை அபத்தமோ,
அந்த மாதிரியாக நிகழ்கிறது
எமது இரவின்
புணர்தல் வேட்கை.

நன்றி உயிரோசை..

தோழமையின் ஆல்பம்

2011-02-22T09:15:00.000+03:00

ஒரு வண்ணத்துப்பூச்சியின்
மரணம் பாதித்ததிர்ந்த
மழலையென நகர்கிறது
தோழியிடம் சொல்லத்தவிர்த்த
எனதன்பு.

நாளையும் வருகிறாள்
எல்லா வடிவிலும்
தனதன்பைத் திரும்பத் திரும்ப
என்னிடம் உமிழ்ந்துகொண்டே
திரும்பிவிடுகிறாள்.

நன்றி உயிரோசை..

நிக்கோடினை உலர்த்திய புன்னகை

2011-02-18T18:24:00.000+03:00

ஒரு பட்டாம்பூச்சிக்கு
துப்பட்டா சுற்றியது
மாதிரி இருந்தாள்
அந்தப் பள்ளிச் சிறுமி.

அவள் பென்சிலும்
ரூல்ட் பேப்பரும்
வாங்கிச் செல்லும் வரை
நிக்கோடினுக்குத் தீயிடாது
நிதானித்திருந்தேன்.

பள்ளி காம்பவுண்டினுள்
நுழைந்த பின்னான
மூன்றாவது பாதத்தில்
திரும்பியவள்
ஒரு குட்டிப் புன்னகையை
வீசியெறிகிறாள்!

நன்றி இந்த வார ஆனந்தவிகடன்.

மாய வலை

2011-02-08T18:07:00.000+03:00

பல ஆயிரந்துண்டுகளாக
வெட்டி வீசப்பட்ட
நிலாவை நட்சத்திரங்களாக்க
சந்தர்ப்பம் தேடுபவளாய்
எனது பெரிய பெண்குழந்தையும்

பல்லாயிர நட்சத்திரப்புள்ளிகளை
ஒற்றை நிலவாக்க முயல்பவளாய்
என் இளைய மகளும்

ஒரு புரிந்துகொள்ளாமையின்
அபத்த இரவில்
கக்கூஸை மூடிவிட்டு
அழத்தொடங்குகிறேன்.

நன்றி உயிரோசை..

நகரத்தைப் புணர்தல்

2011-02-06T11:38:00.000+03:00

டிராபிஃக் நேரத்து
ஸ்கூட்டிப் பெண்ணின்
டைட் பேண்டில்
தளர்ந்து கொண்டிருந்தது
எனதுப் பெருநகரத்தின்
வெறுமை.

மௌனத்தின் நிழல்

2011-02-01T19:44:00.000+03:00

மௌனத்தின் மரணத்தை
என் கனவின் பெருவனத்தில்
அனாயாசமாகப் புகுந்து
ஒரு மரம் ஏறும் அணிலைப்போல
வெகுவிமரிசையாக கொண்டாடுகிறாள்.

ஒரு மயான நிசப்தத்தில்
ஒரு நதியின் சப்தம்
கலவுவதாய்
இரவின் நிழலைப் படிக்கிறேன்..

ஒரு சிறு புன்னகையை
எழுத வார்த்தைகளற்று
நொடிகிறேன்..!

நன்றி உயிரோசை..

துயர்பறவையின் உடைந்த சிறகு..!

2011-01-12T14:48:00.000+03:00

பல்லி விழுந்த பாலெனப்
பருகத் தரப்படுகிறது
கோப்பை மௌனம்.

குறியீடுகள் விழுங்கிய
பாம்பென பாறையென
விம்மித் தும்முகிறது இதயம்.

உச்சபட்ச நிராகரிப்பின் கசப்பில்..

வரைபடத்தின் முனைகள் மடக்கி
கப்பலென செய்து
பால்யத்தில் மிதக்கலாம்
எனப் புலம்புகிறாள்
மென்று துப்பிய நாவும்
சிவந்த கண்களும்
வீங்கிய கன்னங்களுமாய்
தோல்விப் பெண்..!

நன்றி உயிரோசை..

உருகி வழியும் பகல் !

2011-01-03T19:20:00.000+03:00

எதிர்வீட்டு கோமதிஅக்கா குழந்தையிடம்
இனி உங்கஅப்பா வரவேமாட்டாரென்றேன்
கண் மீறிய நீருடன்,
அதற்கது தெரிவித்த முகபாவம்
போனவாரம் சாமிட்டபோன
அதோட நாய்குட்டிக்கு
லாவகமாய் பொருந்திப்போனது
பால்யத்தின் பிழையன்று !

அதே குழந்தை
அதே டெடிபியர்
ஓரிரு நாட்களுக்கு
விளையாடுவதற்கு மட்டும் தடை
புரியாது
அழுது அடம்பிடிக்கும் பிள்ளைக்கு
தாத்தா மடி
தாய்மடியாகிப் போகிறது !

நன்றி உயிரோசை..

மீள்வருகைக்கான நேச இணங்கல்..

2010-12-29T12:10:00.000+03:00

கையாண்ட சொல் பிசுபிசுப்புகளை
எதைச் சொல்லி நிராகரிப்பது
என்ற ஒன்று இருந்துவிடுகிறது

அவர்களின் மௌனப்பைக்குள்
ஒரு கூர்தீட்டப்பட்ட கத்தியினை யொத்து.

மறுசந்திப்பிற்கான
ஆயத்தக்கூறுகள் நெய்து,
ஒரு விரும்பத்தகாத் தர்க்கமென
விசும்பிக் கிடக்கும் நேசத்தின்
ஆழ் மனங்களை
ஒரு கோப்பைத் தேநீரிலிட்டு
கலக்கி குடிக்கும்
அந்த ஒரு தீர்க்க முடிவினை
பரிசீலனையில் அடைத்துப் பூட்டிவைத்திருப்பதாக
ஒருவர் மாற்றி ஒருவர்
கைப்பட கடிதம் எழுதிய
அந்த ஏகாந்த வேளையில்,
ஒரு காதல்
இசைந்திருக்கிறது தான்இன்னும் இருப்பதாக.

இயலாமையின் தீயில்
அந்த ஏகாந்தவேளை எரியுமுன்,
மீள்வருகைக்கான நேச இணங்கல்
ஒன்றைத்தவிர

யாதொரு நோக்குமற்ற
ஒரு பழைய டைரிக்குறிப்பு அதென
நீங்கள் உரக்கச் சொல்லலாம்
அல்லது
என்னைப்போல படித்துவிட்டு மூடிவிடலாம்
யாருமறியாது ரகசியமாகவும் கூட!

நன்றி உயிரோசை..

அரேபிய ராசாக்கள் 14..

2010-12-06T19:10:00.000+03:00

அமர்ந்த நாற்காலியில் இல்லாத நான்
கண்களை அகல விரித்தபோது
நகரும் படிக்கட்டுகளில்
நின்று கொண்டிருந்தேன்..

அரேபியப் புழுதியை
இதயத்தில் ஒத்தி
சற்று கைகளை நீட்டியபொழுது
ஆகச்சிறந்த நொடி இதுவென
கவனம் உணர்ந்தேன்..

மதியம் உண்கையில்
அம்மாவின் ஈரப்புனகை
சாம்பாரில் இனித்தது..

பின்-மாலைப்பொழுதில்
பிரிவு அறிந்தவர்கள்
சாக்லேட் புன்னகையோடு
சிறகுப்பறவை பறந்ததையும்
அழகுப்பெண் வணக்கத்தையும்
காதுகளில் முத்தம் கொண்டனர்..

அடர்வர்ண காலங்களில்
எனத் தொடங்கப்பட்ட
உரையாடலின் நடுநடுவே
ஈச்சமர வாடையும்
மணல் அலையும்
வந்து வந்து ஒட்டிக்கொள்கிறது..

இரவு உறங்கப் போகையில்
அப்பாவின் விரல்களில்
அன்பை பரிசுத்தமாகப்
பரிச்சயம் கண்டது
உச்சந்தலை..

விடுமுறை தீருமுன்
எப்படியாவது
காதலைச் சொல்லியாக வேண்டும்
கூடப் படுப்பவளிடம்..

பாட்டி தாத்தாவோடு
கதைபேசும் வெண்ணிலாவை
இம்முறையும்
கூட்டிப்போவதாகயில்லை
விமான வாசல்.

நன்றி உயிரோசை..

கடவுள் நேர்முகத்தேர்வில் இருப்பதாகச் சந்தேகிக்கிறார்கள்..!

2010-11-29T17:23:00.000+03:00

பிரார்த்தனைக் கூடத்தில்
கூட்டம் கூட்டமாகப்
பிரார்த்திக்கிறார்கள்.

தப்பி ஓடிவந்து கொண்டிருக்கிறேன்
பேரிரைச்சலிலிருந்து.

புகைத்துக்கொண்டே மது அருந்துதல்
கணேசன் சித்தப்பாவுக்கு
மிகப்பிடிப்பதுபோல
தனிமையில் நமஸ்கரிப்பதை
அதிகமாக விரும்புகிறேன்.

கடவுளுடன் பேசுகையில்
கண்களை மூடிக்கொள்ளுதல்
எனக்குப் பிடிப்பதேயில்லை
முடிந்த கலவிக்குப்பின்
முத்தமிடாமல் கிடப்பதைப்போல.

பிரார்த்தனை நேரங்களில்
குழந்தை அழும் சப்தம்
காற்றில் கலந்து வருகிறதெனில்
கடவுள் நமது பிரார்த்தனையைக்
கவனிக்கிறார்
என்ற அர்த்தத்தில் எழுதப்படுவதை
நாளடைவில் வேறொருவன்
மீண்டும் எழுதிவைக்கலாம்
அல்லது
மனப்பூர்வமாக நம்பலாம்.

கடவுள் அல்லாத ஒருவன்
நம்பும்படியாகச் செய்யச் சொல்லும்
பரிகாரங்கள் அனைத்தையும்
கடவுள் அல்லாத நான்
எப்பொழுதுமே ஏற்றுக்கொள்வதில்லை
இப்பொழுதெல்லாம்
கோமதி சித்தி
என்னை அவ்வளவாக இஸ்டப்படுவதில்லை.

தன் மதம்அறியா
விநோதக் கடவுள்
தனக்குப் பசிப்பதாக
என்னிடம் வந்தான்
கடந்த இரவில்
பூத்த கனவில்..!

அதிகாலை தொடங்கித்
தேடிக்கொண்டிருக்கிறேன்
எனக்குப் பிடித்த உணவோடு..

கடவுளைக் கண்டால்
யாராவது அழைத்துவரலாம்
எனது முகவரியில்
நான் மட்டுமே பிரார்த்திக்கிறேன்.

மீண்டும் சொல்கிறேன்
கடவுளைப் புறந்தள்ளுதல்
எனது நோக்கமல்ல.

நன்றி உயிரோசை..

வேறொன்றுமில்லை.

2010-11-22T17:06:00.000+03:00

வியர்வைப் பிசுபிசுப்பில் கருகித் தகிக்கும்
உலோக அடைப்பான் பயணத்தில்
நான் அடைந்த நகரம்
எனக்கு மிகப்புதிதாக இருந்தது..

நகர்தலின் அதிர்வு தாளாது
பித்துப்பிடிக்கிறது மனமும் உடலும் ஒருசேர
முதுகுமுன் மார்புகளை சிலாகிக்கும்
அப்பருவப்பெண்ணிடம்..

வலுவற்ற
ஒரு புன்னகையைத் தருவிக்கிறேன்
வழியற்றுத்
தலையில் செருகிக்கொள்கிறாள்..

கவனித்தலில்
சிக்னல் யாசகப் பிள்ளைகளுக்கென
ஒரு தீர்வும் எடுக்க இயலுவதில்லை..

பருவம் எய்க்காத
பெண்ணுக்கு
அடுத்த பேருந்தில்
அமையப்பெறலாம் பிரசவ வலி..

அவசியமில்லை,
காரணங்களைக் கண்டறியுமுன்
நிறுத்தம் வந்துவிடலாம்.

எனது நிறுத்தத்தில்..

ஒரு தேநீர் டம்ளரிலோ
ஒரு சிகரெட் புகையிலோ
ஒரு டாஸ்மாக் முட்டையிலோ
பழகிக் கொள்கிறேன் இந்நகரத்தை.

நன்றி உயிரோசை.

நிராகரிக்கப்பட்ட காகிதங்கள் உதிர்க்கும் மூச்சு..!

2010-11-15T17:14:00.000+03:00

பிடிமானங்களற்று
உடைந்து கொண்டிருக்கும் நாட்களில்
பாழ்மண்டப வெளவால்களைப்போல
நடந்து திரிகிறேன்..

காகிதங்களில் அடைபட்டிருக்கும் உயிரை
ஏந்திக்கொண்டு
தெருத்தெருவாய் அலைகையில்
சுவாசம் முட்டுகிறது.

தற்சமயம்
ஒரு எரிமலை துப்பித்தள்ளும்
அடங்காத் தீயில்
மாட்டிக்கொண்ட
ஒரு பூச்சியினைப்போல
நேசிக்கப்படுகிறேன்
உங்களால்..!

முதல் சூரிய உதயம் ஞாபகத்திலில்லை
இக்கடைசி சூரியோதயம் மறப்பதற்கில்லை.

நன்றி உயிரோசை..

படிதல்.

2010-11-08T19:05:00.000+03:00

சில காலைகளை
நேரிட நேர்கிறது
பனி இரவின்
செத்த சிகரெட் துண்டுகளோடும்
உடைந்த மதுவாடைக் குவளைகளோடும்

ஒரு பிரியத்தை தெரிவிப்பதற்கு
வாய்க்கப்பெறாத நாட்கள்
தொடர்ந்து ஊசிக்கொண்டேத்
தடயமாகிறது செத்துப்போவதற்கு.

அதிக சிரத்தையுடன்
அந்த அபத்தப் பொழுதின்
படி ஏறி நின்றுகொண்டு
பிரியத்தைச் சொல்லும்போது
எதிர்கொள்வதற்கு அவனோ அவளோ
இல்லாமல் போகின்றனர்.

வதங்கிய மௌனத்துடன்
கணம் துரத்தியடிக்கிறது
தவழ்ந்து கடக்கிறோம்.

சில இரவுகளை
நேரிட நேர்கிறது
வெயில் பகலின்
குரூர மரித்த ஸ்பரிசங்களோடு.

நன்றி உயிரோசை..

இருப்பாலானது மற்றும் இருப்பிலாலானது..!

2010-11-01T18:09:00.000+03:00

காரணங்களற்று இருத்தல்
அல்லது
காரணங்களோடு ஒத்துப்போதல்.

இடை இடையே
எங்கிருந்தோ உதிர்ந்து விழுகின்றன
வினவுகள்.

பலரும் அதில்
அநேகமாகப் பதிலும் கொப்பளித்து விடுகின்றனர்
அவை சமாளிப்பாகவும் இருந்து தொலைகிறது
ஆனால்..
அதில் பலரும்
அதனை சுட்டிக்காட்டத் தயங்குகின்றனர்.

நிரம்பத் தழும்பிய நரம்புகளுடன் சிறு இலையொன்று
காற்றில் முறிபடுவது
எப்பொழுதும் நடைபெறும் நிகழ்வே !

சில சமயங்களில்
கூர்ந்து உள்புக முற்படுவதில்
அலாதிப்பிரியம் எனக்கு..!

நன்றி உயிரோசை..

வெற்றுடல் தேவதைகள்..

2010-10-25T17:43:00.000+03:00

முகங்களற்ற
நிழல்களற்ற
மழை பூத்த சாலையில்
இன்னல் தனிமையைத் தூவிச் செல்வதற்கென
அமையப்பெறுகிறது அவனுக்கு
அம்மதியப்பயணம்..

தலை நொடித்து கற்கள் கொஞ்சத்தை
உள்ளங்கை தனில் அடுக்கிக்கொண்டு
சாலையின் கடைசி வளைவில்
கால் மடித்துக் கொள்கிறான்.

கற்கள் ஒவ்வொன்றாகத் தொலைபடுகிறது..

தனித்த கைகளாகிய நிலையினில்
ஒரு அமைதியை அடையாளப் படுத்துகிறான்,
அமைதி அதன்பொருட்டு
அமைதியைத் தருவிக்கிறது..!

கன்னம்வழி வளர்ந்த நீரில்
கடுமையாக உப்பின் வாசம்..

காற்று கொணர்ந்த இசையில்
உப்பின் அடர்த்தி குறையக் குறைய..

பதில்களற்ற எல்லா மடல்களும்
காகிதங்களாகத் தோற்றுப்போகிறது.

நன்றி உயிரோசை..

சுயம் தொலைதல் அல்லது தொலைத்தல்..

2010-10-18T16:25:00.000+03:00

முழு நீலக்கடலில் கோடிநட்சத்திரங்கள்
அம்மணமாய் ஆடித்திரிவதை
நாய்கள் குரைக்கும் நடுநிசியில்
வோட்கா பாட்டிலிலும்
ஆறாம் விரலிலும்
ரகசியமாய் வழித்துக்கொண்டிருந்தேன்..!

முடியாது நீண்டிருந்த அவ்விரவின்
மற்றொரு கனவில்
தடித்த ஸ்தனக்காரி வற்புறித்திய வண்ணம்
வருத்தி பின்தொடர்ந்திருந்தாள்..

பின்னொரு கறுத்த ஆடு
தலையற்று முண்டமாகி
தடாகத்தில் சிவத்த இரத்தத்தை
வழியவிட்டபடி செத்துக் கொண்டிருந்தது..

கனவுகள் நிறைய நிறைய பேசியதோடே..

ஆழ்வானத்தின் சிறுதுளையில்
மழிந்து மாய்ந்துகொண்டன.

அந்த ஒரு இரவு
விடிந்தபாடில்லை
இன்னும்...!!

நன்றி உயிரோசை..

நிழலென வளரும் மரம்..!

2010-09-22T12:00:00.000+03:00

சக்கரங்கள் சுழலும் தண்டவாளங்களில்
உருளும் இசையென
மனம் பிரள்கிறது,
நிரம்பிய குடம் உடைந்து
பூ உதிர்ந்த தருணம்..!

குளுக்கோஸ் குழல் வழி
தெம்பூட்டப்படுபவளின்
ஆழக்கண்கள் பூவை நனைக்க,
அவள் புருவங்களுக்கு மத்தியில்
உதடுகள் உப்பி நீர் பதிக்கிறான்
பூ செய்தவன்..!

புதுப் புன்னகை ஒளி
வெளியெங்கும்
நிழலென வளரும் மரமாய் !

அழுது அழும் பூவுக்குத்
தேவதைகள் கதைசொல்லத்
தழும்பும் சமயம்,

நான் கொண்டுசென்ற பழக்கூடை
சிறு சிறு வர்ண நட்சத்திரங்களை
சிறகசைத்து தருவதாகவும்
அவற்றைப் பத்திரப்படுத்தி வைக்குமாறும்
அக்குழந்தைப்பூவே சைகை செய்கிறது
பிரசவஅறை ததும்ப..!

நன்றி உயிரோசை..

மிகநெருங்கிய மரணத்தின் கசடு..

2010-09-14T06:17:00.002+03:00

யாருமற்ற குழந்தைக்கு ஒத்தடமாய்
இந்த நகரம்
என்னைத் தெருக்களில் நடத்திக் கொண்டிருக்கிறது..

இந்தப் போதைக்கு
எனக்கே என்னைப் பிடிக்காதிருக்கையில்
யாருக்கு என்னைப் பிடித்துவிடப் போகிறதென
வினவுவதாகவுமில்லை.

தொலைபேசியில் வந்த செய்தியை
நெடுநேரமாய் உமிழ்ந்தவாறே..
அது மட்டும் உறுதி,
பதில் அனுப்பப் போவதில்லை
இம்முறை என்னை நான்
தோற்றுவிடப் போகிறேன்.

இருப்பதைவிட
இல்லாது இருப்பது
என்னை மிகசௌகர்யமாக இருப்பதாக
உணரும் தருணம் இது.

இப்பொழுதெல்லாம்,
கண்கூசும் பகலில்
பத்துக்குப் பத்து அறையைவிட்டு
வெளியெங்கும் நான் நடமாடுவதில்லை..

இரவுமட்டுமே பிடித்துப் போய்விட்டதோ யென்னவோ,
நெடுநாட்களாய் வானம்
பசியூட்டியவாறே குழந்தையைத்
தொடர்கிறது.!

எனது தொலைபேசியில்
நான் வாசிக்காத செய்திகள்
குவிந்து கிடக்கிறது.

நன்றி உயிரோசை..

எரியும் மெழுகில் நனையும் இரவு..

2010-09-02T14:17:00.000+03:00

சிற்சில ஞாபகங்கள்
என்றுமே அழியாதிருப்பின் அடையாளமாய்
பழையதை யொத்த கடிதங்கள்
இன்னும் சிற்சில..

இன்றும்..!

ஒரு மழைநாளில் தான்
உருகி வழிந்தது இரவு
நமக்கான மெழுகில்..!

அம்மெழுகின் கதகதப்பு,

என் வாழ்வின் கதவடைபட்ட பின்பும்..
தீராக் காற்றின்
எல்லாச் சுவர்களிலும்
மோதிக்கொண்டுதான் வாழ்கிறது..

ஒரு முடிந்த உரையாடலின்
எல்லாச் சொற்களிலும்
நீயே காதலி..

முடிவில்லா எழுத்துக்களின்
எல்லாக் கடிதங்களிலும்
நானே காதலன்..

மெழுகு உருகட்டும்..
இரவு நனையட்டும்..!

நன்றி உயிரோசை..

நேசப்பரிபாஷை..!

2010-08-20T11:26:00.000+03:00

கடல்மேல் பறவையாகும் வானம்!

போன்றதொரு நேசப்பரிபாஷையினை
விழிகளிரண்டிலும் அழுந்தப் பிடித்தவளாய்..

என்னை மிக நெருக்கத்தில்
பருகச் சொல்லிக் கெஞ்சுகிறாள் !

அப்பொழுதும் என்னை நான்
மிகப்பத்திரமாக மௌனமாகவே
தொலைத்துக் கொண்டிருந்தேன்..!

காய்ந்த அந்த ஒற்றைரோஜா இதழ்கள்
மழையின் ஈசல் போல்
அவளது மென்விரல்களில்
தன்னைச் செத்துக்கொண்டிருந்தது..

அப்பொழுதும் மௌனமாகவே வைத்திருந்தேன்
என்னை நான்..!

பிரிவின்..
கையடங்காக் குருதியினை...

ஒரு முத்தத்தில்..

எரித்துவிடத் தயாரானவாளாகி,
எனது வன்விரல்களை
மெல்லப் பற்றிக் கொண்டு
அழ.. அழ.. அழுதேவிடுகிறாள்...

நான் பெருமழையாகி
அவளை இறுகக் கட்டிக்கொள்கிறேன்..

பின் ஒருவானவில்லின் மேல்
இருவரும் கைகோர்த்து நடக்கின்றோம் !!

வண்ணத்துப்பூச்சிகளும்..
காதலும் ( "காதலென்ற ஒற்றை வார்த்தையில் அடங்கிவிடுவதல்ல அது!" )
எங்களுக்கானது.. எங்களுக்கானதே..!

நன்றி உயிரோசை..

நிலாவிளக்கும் மௌனஇரவும்..!

2010-08-10T04:18:00.000+03:00

மழைநேரத்துக் குடைக்கும்
வெயில்மதிய நேரத்துக் குடைக்கும்

இடையானதொரு மெல்லிய ஊடலாய்,

தயங்கித் தயங்கி..

செதிலுரிகிறது வார்த்தைகள்,
பரிசுத்தமான கூடலுக்கு !

பிறிதொரு பரிச்சயப் பொழுதில்..

நிர்வாணம்
உச்சிமுகர் சொல்லாடலில் தழைக்கும்,

இந்நொடிவரை யாதொரு பிசிபிசுப்புமின்றி
மருகி அசைகிறதொரு நிலாவிளக்கு !

தயங்கித் தீர்ந்த கற்பனைக்கடலில்

தங்கமீன்நிற இரு பறவைகளின்
வெட்க மௌனங்களும்
முழுமையாய் இசைக்கத் துவங்க,

அப்பேரலையின் வெளியெங்கும்
இயல்பானதொரு படுக்கையறைக் காட்சி !

எங்கோ ஒரு படுக்கை புணர்ச்சி கழிந்து
புன்னைகையோடு விடுபடலாம்.

நன்றி உயிரோசை..

அரேபிய ராசாக்கள் 13..

2010-08-02T17:21:00.001+03:00

மழைபோல் பெய்யும் வெயில்,
எழுத எழுத எழுதிவிடு
வரியைப் போலல்ல வாழ்வு.

மலரென விரியும் இருள்,
பிழையாயினும்
வக்கற்று எரிகிறது
இளம் மூங்கில்..

மெல்லப் பரவும் காற்றின் திசையில்

ஒற்றைச் சிறகின் நிழல்,
புனைவிரவின் ஈர நெடி.

ஒரு அரேபியா
ஒரு பாலை
ஒரு கானல்
ஒரு நிஜம்.

யாசிப்பு யோசனைக்கு மறுதலித்தும்,
ஒலி என்பதைக் காட்டிலும்
இசையெனச் சொல்லிவிடுவது
ஆகச்சிறந்தது.

நன்றி உயிரோசை..

அரேபிய ராசாக்கள் - பிரிவு அறிவித்தல்..

2010-07-30T11:46:00.001+03:00

நிசப்தத்தின் நிசப்தம்..!

அன்று நான் வழியனுப்பப் பட்டேன்.. அதனை, டாட்டா காட்டி அனுப்பினார்கள் என்றுகூட பிள்ளைத் தமிழில் சொல்லலாம்.. உயர உயர பறக்கப் பறக்க.. என்னை, என் இயல்வாழ்வைத் தாழ்த்திக் கொண்டிருந்தது விமானம்.. இதுதான் ஒரு ஆழ்ந்த நம்பும்படியான பொய் என்பேன் பிற்பொழுதில் அரேபியக்கதை கேட்கும் பாரபட்சமற்ற யாவரிடமும்..

ஆகும் நொடியில், வெயில் அடித்து மழை ஓய்ந்த மனநிலையில், இப்பெரும் அரேபியாவின் கொடுமணல் குன்றின் மீது ஒருநாளைக் கடக்கும் ஒவ்வொரு நொடியையும் கடத்திக் கொண்டிருக்கிறேன்..

பணியெடுக்கும் ஒட்டகப் பாலையில், என்றோ அன்று வெறுமையின் அர்த்தம் தாங்காது, கொதி வெயிலில் நனைந்த பைப்பின் மீது வெல்டிங் ராட் உபயோகப்படுத்தி கிறுக்கிய என் பெயருடன் கூடிய நண்பர்கள் இனிசியலை.. கண்டு கொண்டிருக்கும் வானத்தை தீர்க்குமுன், ஒரே ஒருமுறை கண் ஒத்தியெடுக்கவல்லாத ஆசையோடு ஞாபகங்கள் மருகுகிறது கசக்கிப் பிசைந்து இதயக் கூட்டினை..

எழுதுவதை நிறுத்திவிட்டுப் பார்க்கிறேன்.. உயிர் உருக உருக உருகுவதை..!

யானைப்பாகன் பழக்கி வைத்திருக்கும் ஒரு யானையைப் போன்று சொன்னதைச் செய்யும் மனமாக இருந்த மனசு, சொல்லச் சொல்லக் கேட்காது அடம்பிடிக்கும் மழலைப் பிள்ளையாக.. என் செய்வேன் என்னை ??

மொழிப் பெயர்த்தலும் மௌனச் சொல்லாக உருப்பெயர்வதை, எந்தப் பூட்டுக் கொண்டும் அடைக்க துணிவற்று.. செத்து செத்துப் பயில்கிறது இதுவன்றோ என்னை நான் இருத்திக் கொண்ட இருத்தலென..!

மிகுப் பேரமைதியாக சொல்லப்போனால், தாயை விட்டுப் பிரிந்த வளர்பறவைக்கு உயிர்வாழ எது தேவையென சுலபத்தில் பிரித்தறியாத் தருணம் போல அவிழ்க்கிறேன் என்னை என்னிலிருந்து..!

கடந்துபோன நானூற்று எழுபத்தைந்து நாட்களில் இல்லாத வெறுமை அறையெங்கும்.. இம்மண்ணை விட்டு நகர்ந்தாலும் ஒரு போதும் தீரா வாசமாகத்தான் இருக்கப் போகிறது அரேபிய ஞாபகங்கள் மனசின் அழியாப் பாகங்களில்.. நிஜம் இதுவோ அல்லது வெறும் பிரம்மையோ! என்னை நானே கேட்டுக் கொள்ளத் தவிக்கிறேன்.. பிறகு தவிர்க்கிறேன்.. இந்த நிசப்தத்தின் நிசப்தம் அலுவலகத்தின் கடைசிக் கணக்கு முடித்தலின் பேரமைதியைக் காட்டிலும் அதிக வலியோடு அமிழ்கிறது..

கொப்பளித்துக் கொண்டிருக்கும்போதே ஒரு கேள்வி உயிர்ப்பெறுகிறது.. நான் மட்டும்தான் பைத்தியக்காரனா இல்லை என்னை மட்டும்தான் இப்பைத்தியம் பிடித்து ஆட்டுகிறதா?? சமயங்களில், சிறு குழந்தைகள் அம்மாவின் தீட்டுப்பற்றி தெரிந்துகொள்ள விருப்பப் படுவதைப் போலொரு சூழலோ யென்று.. கேள்விக்கு கேள்வி கொண்டே பதிலும் சொல்லப் பிரியப் படுபவனாகிறேன்..!

ஒரு முழுநாளின் நொடிகள் மிதம் மிஞ்சித் தீரும் பொழுதுதனில் தாள தாளப் பறக்கும் விமானத்தில் நான் உயர உயர பறப்பேனோ..? நம்பிக்கையின் கீற்று நட்சத்திரங்களைவிட பிரகாசமாக.. அது போதும் அது மட்டுமே போதுமெனக்கு.. கூச்சமென்ன வேண்டிக் கிடக்கு கூச்சம்.. எழுது, இன்னும் எழுது எழுதென்று பின்தொடரும் நிழலின் ஒலி சன்னமாகக் கேட்பதை உணர முடிகிறது..

முன்பு இதே மாதிரியான, என்னைப் போன்றே.. விலாசம் இடாது கடிதம் எழுதி, எழுதிக் கிழித்திருக்கிராறாம் அவர்.. அப்படி என்னப் பெரிதாக முடித்திருக்கிறேன் , வெறும்..வெறும்.. நானூற்று எழுபத்தைந்தே நாட்கள் , அதுவும் திருமணம் முடிக்காத இளைஞன்.. எதிர் அறை நண்பருக்கோ என்னைப் போலொரு மகன், என் தங்கையைப் போலொரு மகள்.. என்னைப் போன்றே விலாசம் இடாது கடிதம் எழுதி பல நான்கு முறை எழுதிக் கிழித்தாராம்.. எரிசாராயத்தின் உச்ச போதையிலும் பகிர்ந்து கொண்டே படுக்கப் போனார்..நான் என்ன அப்படிப் பெரிதாக...

உலகம் பெரிது .. காலம் வலியது.. சிறியோன் நான்..இன்னும் எத்தனையோ வாழ வேண்டும்...
கடல் தாண்டி, கடலைக் காட்டிலும் பேரன்பு சூழ்ந்த இருப்பினையே எனக்கு வழித்திருக்கிறீர்கள் உங்களில் யாவரும்.. கடவுள் என்றுமே எனக்காகப் பிரார்த்திப்பார்..!

முழுநாள் நிர்வாணமாய் யொதுங்கிய அறைக் கதவினை டம் டம்மெனத் தட்டுகிறார்கள்.. விமானம் தாள தாளப் பறக்கும்... நான் ஓங்கி ஓங்கி விரிவேன்..

அன்பின் இனியது
அன்பன்றி வேறேதும் உண்டோ.!

ஹாய் அம்மா
ஹாய் அப்பா
ஹாய் தங்கச்சி
ஹாய்டா டேய் உங்க ஆளு சௌக்கியமா ? லெட்டர் கொடுத்துட்டியா.. இல்ல இன்னும் அதே...??

( அவனது 2010 டைரிக் குறிப்பிலிருந்து.. )

வன்புணர்ச்சிக்கு உத்தேசம்..

2010-07-26T22:02:00.000+03:00

ஆசிரியர் மனுஷ்ய புத்திரனுக்கு என் அன்பின் வாழ்த்துக்கள்.. நூறாவது இதழாக இவ்வார உயிரோசை..!

ஆயாசமாய் பகலை அள்ளிவிழுங்குமாறுயிருந்த சூரியன்

குறிப்பிட்டதொரு குறிப்புணர்த்துவதாக சிலாகித்து,

பின்அதில் தொடர.. எதன்பொருட்டோ லயிப்பற்று,

காற்றசைக்கும் மரஇலையின் திசையில்
வெகுதொலை பறப்பதாயொரு முடிவுக்குவந்து..

பின்தொடர் பறவையொன்றின் இறகில்

இரவைக் கொண்டுவரும் நிலவின் நுனிமூக்கில்
கிட்டாதிருந்த கவிதைக்கான
வார்த்தைகளேதும் சொட்டிவிடாதா..

யென்றவொரு கொதியோடு

மனம்புரளும் கொள்ளாத இருப்பில்,

மனங்கொத்திமீனாக வந்துவிடுகிறது
புட்டிவரை கூந்தலுடைய அப்பிசாசின்

உயிர் உறிஞ்சும் கண்கள் !!

நன்றி உயிரோசை..

அலமாரிப் பக்கங்கள்..

2010-07-24T12:37:00.000+03:00

கடைசி உரையாடலின் மௌனங்கள்
பழையடைரியை வாசித்துக்கொண்டிருக்கிறது..
யாதொரு முன்முடிவகளுமற்று..

சமயங்களில்
மறுசந்திப்பிற்கான உத்தியெனவும்
ஓர் உறவு மருகுகிறது
மௌனங்களின் கூர்ப்பக்கங்களில்..

ஒரு தேநீர் மாலையும்
இரு காலி இருக்கைகளும்
நமக்கான முடிவில்,
முந்தைய நமது பிரிவுநாட்களை
யொத்த அதே ஈடுபாட்டின்
நகம் கடித்தலோடு.!

அரேபிய ராசாக்கள் 12..

2010-07-22T08:49:00.000+03:00

கூழாங்கற்கள் தடாகத்தில்
பிறிதொரு கால்களை யோசித்ததாக
குனிந்து முள்ளெடுத்து அதையோரமாய்
விட்டுச்செல்கின்றதொரு கை!

தொலை பயணங்களுக்கு..
காரணங்களென்னவாக யிருக்கமென்ற
யாசிப்பிலொரு கை
எதையோ விட்டுச்செல்வதாய்
நீள்கிறது இலக்கின்றி என் கணம் !

ஒருவன் வண்ணம் தெளிக்கின்றான்,
இன்னுமொருவன் அதை பற்றிக்கொள்கின்றான்,
இப்படியாகத்தான் சுழற்சியில் வாழ்வு..!

நன்றி வார்ப்பு..

பட்டாம்பூச்சியின் சிறகு உதிர்க்கும் வர்ணநிழல்..

2010-07-19T15:59:00.002+03:00

புழுக்கள் ஊரும் சதையென
நெளியத் துவங்கும் இரவின் முகமெங்கும்
ஒரு பைத்தியக்காரப் பட்டாம்பூச்சியினைப் போல
பறக்கத் துவங்கிய அந்த மாயநொடியில்
தனிமை உண்பவன் எழுதப்படுகிறான்
புனைவைப் புசித்து ..

புரிதலின் செய்கைகள்
விழுந்து நொறுங்கிய பீங்கான் சீசாவாகி
தின்னத் தருகிறது மனமீன்களை
படுக்கை அறையில் விழுந்து கிடக்கும்
அடர்மௌன நிழலுக்கு..

ஒரு tumbler கடலும்

உள்ளங்கை size நிலவுத்துண்டும்

இதழ் விரியத்துடிக்கும் roseபூவும்

உங்களுக்கென உமிழத் துவங்குகிறதது
மனமீன்களைக் கொத்தி தின்ற நிழல்!

உங்களில் யாவரும் பருகி
அன்பைக் கொண்டாடுங்கள்..
அன்பின் கட்டடங்கா போதையில் மிளிருங்கள்..

என் தனிமை எனக்குப்

போதுமானது.

நன்றி உயிரோசை..

முன்முடிவுகளைக் கைப்பையில் ஒளித்துவைத்திருத்தல் உகந்ததல்ல...

2010-07-17T09:26:00.000+03:00

மனதை திடப்படுத்திக் கொண்டு
நகரத் துவங்கியது மழை.
தவளைகள் பரிகாசிக்க ,
நட்சத்திரங்களென
வாய்நிறைய அள்ளிவந்தது வானம்
அது விதண்டாவாதங்களின்
வெற்றுக்கூடுகளென அறியாது..!

மழை நகர்ந்து
வெகுதொலை கடந்தும்
தவளைகளும், வானமும்
பார்வை பரிசோதிப்பற்று
முட்டியவாறேப் பிய்த்துக் கொண்டிருந்தன
சாக்கடைக் கதவினை
மழையென உருவகித்து..

பின்னொரு பொழுதில்
மழைபெய்யத் துவங்கியது
மழையாகவே..!
தவளைகள்
யாதொரு அறிவிப்புமின்றி

காணாது போயிருந்தன...

யாதுமாகி...

2010-07-14T16:36:00.000+03:00

ஒரு காதலை
கவிதையிலெழுத வேண்டுமென்ற
அவனுக்கு
இடையூறாகயிருந்தது
ஒரு நட்பு!

ஒரு நட்பை
வாசித்துக்காட்ட வேண்டுமென்ற
அவளுக்கு
இடையூறாக இருந்தது
ஒரு காதல்!

நன்றி கீற்று..

எழுத வாய்க்காத இரவொன்றில்..

2010-07-12T17:31:00.000+03:00

சலனமற்றுக் கிடந்த தலையணையில்
சட்டென வந்திறங்கியது
எனக்கு மிகப்பிடித்த
ஒரு ரயில் பெட்டியும்
ஒரு மழை வண்டியும்..

கனவுகள் காண வலுவற்றிருந்த
எனது இரவுகள்
இக்கடைசி வானத்தைக்
கொண்டாடத்துவங்கியது,
தனிமைநாற்றம்

கடலில் விழுந்த நட்சத்திரங்களின் வாசமென

மாறிப்போனது..

ஒரு மிகுஆசுவாசம்
நான் ஒற்றையான அறையெங்கும்
மெல்லப் படர்ந்து
என்னைக் கட்டிக்கொண்டது..

இனி ,
ஒரு குழந்தையின் மென்சிரிப்பாக
ஒரு பதின்வயதுப் பெண்ணின் முதலுதிர சந்தோசமாக
முதல் குழந்தைக்குத் தாயான ஒரு பெண்ணின் முகமாக
தனதான பெண்ணின் மிகுஅன்பில் ஒரு ஆணின் வெட்கமாக
தைரியமாய்
சப்தமாய்
யாவரிடமும் தெரியப்படுத்தப்படும்..

எனது டைரி நிரம்புகிறது..

யாரும் என்னைத் தடுக்கப்போவதில்லை
அறை எண் 7ல் நான் மட்டுமே

தற்கொலைக் குறிப்பெழுதுகிறேன்.!

நன்றி உயிரோசை..

கடந்து செல்லுதல்.

2010-07-05T20:46:00.000+03:00

பால்யத்தைக் கடக்க எத்தனிக்கும்
பதின்வயதின் சட்டைப்பையெங்கும்
வண்ணத்துப்பூச்சிகளின் கூடாரம்..

சில சிறகு உதிர்ந்தவைகளாகவும்
சில உதிர உதிரப் பறப்பவைகளெனவும்..

ஒரு முழுவதுமான கையறுநிலையில்
பிரியத்தின் நிழல்கள்
செத்து செத்துக் கிடக்கின்றன
பொழிதலின் மழைச்சாலையெங்கும்..

இன்னும் மின்னிக் கொண்டுதானிருக்கின்றன
வானெங்கும் நட்சத்திரங்கள்
ரசிக்கத்தான் என்னிடம் நானில்லை.!

அரிதாகப்பூக்கும் ஒரு காட்டுப்பூவினைப் போலவோ
எறும்பு மிதக்கும் ஆற்றின் இலைபோலவோ
ஒரு சில சமயங்களில்
கடந்து கொண்டுதானிருக்கிறது
என்னை இந்த வாழ்வு.

நன்றி உயிரோசை..

வலைச்சரத்தில் எனது எதற்கேனும் ஐ! அறிமுகப் படுத்தியிருக்கிறார் மாமா பா.ரா.. நன்றியும், மகிழ்வும் மாமா :-)

பரிச்சயமற்ற புனைவு.

2010-07-03T08:16:00.005+03:00

இன்னும் எத்தனை நட்சத்திரவானுக்குப்
பின், அவளது சேகரித்த முத்தங்கள் மீளுமோ.

ஓராயாச எதிர்நோக்கலில்
குருவாளின் சொச்ச குருதியும்
கனவறை பருக,
கடல் குடிக்கும் உப்பாயுறைகிறது மீன்.

உடைந்த நிலா

ஆசைபௌர்ணமிக்கென வளர்வதாய்

மிகுலெகுவாய் விரல்நீட்டும் வானத்தில்
நிஜ நிழல்கள் இதுவரை எங்குமில்லை
யென்பது எத்தனை பேருக்குத் தெரியவருமோ.

வயதினை வயதே குடித்தலென்பது
நீர்தேங்கி யழுகிய வேரிலொட்டிய
மண் எனலாம், சற்று குரலைக் குறைத்து.

அர்த்தமற்றதனிமைக்கு இளமை இரையாகிறது
மரமில்லா ஒடிந்த கிளையென.

இரவோடு இரவாக
புகைமாண்ட அழுக்கு அறையில்
துவம்சமாகிறதொரு ஒற்றைக் காமமும்

உயிர் உருகும் காதலும் .

நன்றி கீற்று..

முன்பறியாதிருந்தது...

2010-06-30T22:57:00.000+03:00

ஒரு உண்மை தேவைப்பட்டது
காதல் பரிச்சயப்பட்டது .

ஒரு காதல் தேவைப்பட்டது
மூன்று முறை
நட்பு தோல்வியில் கனிந்தது .

ஒரு நட்பு தேவைப்பட்டது
நான்காவது முறையாக
காதல் சொல்லப்படுகிறது .

எல்லாவற்றையும்
லெகுவாய் கடந்துவிட
ஒரு பொய் தேவைப்பட்டது,
ஒரு நரகம்
சிரத்தை ஏதுமின்றி
கவனிக்க மறுதலித்தது .

வளர்ப்பு நாய் இறந்துவிட்டது
தெருநாயைப் பற்றி கவலைப்பட
யென்ன அவசியம்..

உங்களைப்போல நானென்பதில்
எந்தவிதமான இடையூருமில்லை எனக்கு
என்னைப்போல் நீங்கள் எனலாமெனில்
யோசிக்க வேண்டிவரும்.

தீரவாய்க்காத இருப்பு.!

2010-06-25T11:23:00.000+03:00

கிடைத்துவிடாத வண்ணத்துப் பூச்சியின்
ஸ்பரிசத்தை அழுதலில் மீட்டுகிறது
அக்குழந்தையின் தனிமை ,
என்பதாய் இன்னும் நிறம்வாய்க்காத
ஒரு கவிதையைப் போல்
கழிந்து கசிகிறது
பிரிவதாய் முடிவெடுத்தப்
பிரிவின் வாசனை.!

காதல் ஆதலால்..

2010-06-23T12:21:00.000+03:00

உனது வருகைக்குரிய
அன்பின் தடங்கள்..
ஒரு காத்திருப்பின்
பரிச்சயத்தை ஆயாசமாய்
அள்ளி முகர்கிறது,
ஒரு தாயின் மாரில்
குழந்தைகள் மருகுவதென .

ஒரு காத்திருப்புக்குப்
பின்னுள்ள மௌனங்களை
எப்படி மௌனமாக்குவதென்ற
கேவல்களில்தான்
அமிழ்ந்துவிடுகிறது
இன்னும் காதல்
காதலாகவே .

ஒரு காதல்கவிதை
எத்தனை எளிதோ
அத்தனை எளிதே அல்ல
ஒரு காதல் சொல்லப்படுவதென்பது .

மழைதூவும் நெடுஞ்சாலை வண்ணத்துப்பூச்சிகள்...

2010-06-21T17:28:00.000+03:00

கரும்பூச்சையின்
பச்சைக் கண்களிலிருந்து
தீட்டப்பட்டிருந்தது
ஒரு மரண வெம்மை..

இசைந்து கொடுக்க வல்லாது
மேஜையை
வெறித்த வண்ணம்
கரைந்தபடியாக இருந்தது
ஒரு தேநீரின் ஒப்புமை..

முன்னும் பின்னும்
அலைந்துக் கொண்டிருந்தவள்
தடக்கென எதையோ சொல்லியவாறே
நகர்ந்து விட்டிருந்தாள்..

நிலா விழு கடலென
பூப்பறிக்கத் துவங்கி
நெடுஞ்சாலை வண்ணத்துப் பூச்சிகளாய்
வர்ணம் ஒட்டிக்கொள்கிறதொரு மனசு !!

http://www.uyirmmai.com/Uyirosai/ContentDetails.aspx?cid=3043

நன்றி உயிர்மை.

மழலைகள்வான் ஒதுங்கிய மீன்கடல்...

2010-06-17T12:08:00.002+03:00

பலூன் விற்பவன்

காட்டில்

மழை பெய்வதில்லை
முன் போல். !

அவர்களின்
ஆறுமணி வீடு திரும்பலுக்குள்
ஏழுமுறை மண்டை உடைந்து
செத்துப்போகிறான்
துப்பாக்கிச் சுடுபவன்.
அம்மா அப்பா சண்டை
வீடியோ கேம்ஸ்
கொலைகளைக் காட்டிலும் எரிச்சல்.!

காகித கப்பல்கள்

அம்மாக்களைத் தேடி

நீர்த்துப்போகிறது,

மழலையின் ஆசைகள்
மழலைகளுக்கான ஆசைகளாக
இல்லை.!

மெல்லமாயொழுகும் பால்யம்...

2010-06-15T11:52:00.000+03:00

எறும்பு நகர்ந்திருந்த
வெயில் தரை வழி
மெல்ல ஊர்ந்த
ஏழு வயது பொடியனின்
விரல்களை
அகிம்சை எனவோ
வன்முறையெனவோ
சொல்லி முடிப்பதற்குள்
கனாவொழுகிய இரவொன்றில்
நன்றாக உறங்கி இருந்தது,
எனது அகாலம்
மற்றும்
முந்தைய எனது விடியல்..!

http://www.uyirmmai.com/Uyirosai/Contentdetails.aspx?cid=3032

நன்றி உயிர்மை.

உயிரெழுத்து

2010-06-13T19:37:00.001+03:00

ஒரு முத்தம் மருக
மருக உருண்டோடுகிறது வெட்கநட்சத்திரங்கள்..
ஒரு புணர்வின் இறுதி இரவை
உருகி வழியும் மெழுகின் கதகதப்பில்
வர்ணம் பூசிக் கொள்கிறது குளிர்நிலவு..
ஒரு நான்
ஒரு நீ
ஒரு நாம்
ஒரு அரவணைப்பு.

அரேபிய ராசாக்கள் 11..

2010-06-07T17:01:00.001+03:00

தொடர்ந்த பத்தாவது வாரமாக எனது கவிதை உயிரோசை இணைய இதழில்..
ஊக்குவித்த அனைத்து நண்பர்களுக்கும் நன்றிகள்..

பாலைகளின் வர்ணமாய்
ரீங்கரிக்கும் ஒட்டகங்களில்
நிரம்பித் துள்ளும் தண்ணீராய்
மெல்ல மெல்ல
அண்ணாந்து கசிகின்றன
எழுத முயன்றதின் ரகசியம்.

என்னொரு சாமவனத்தில்
காட்டெருமையின் மூர்க்கத்தோடு
புணர்ந்தவர்களின் முகவரியைக்
கூச்சம்கடாசிக்
குறித்துக் கொள்ளுங்கள் நீங்கள்
எதற்கும் அவசியம் வரலாம்.

எனதிந்த விடியற்காலை வானில்
குழுமியிருந்த
சிறுவர்கள் என்னையும் சிறுவனாக்கிச்
செல்கிறார்கள் ,
ஆர்வமிருப்பின் நீங்கள்
ஒரு கவிதை புனையுங்கள்
எதற்கேனும் அவசியமாகலாம்.

நட்சத்திரங்கள்உதிர் கடலில்
நிலவைத்தூக்கி வரும் தனிமை
முகர்ந்து பருகுங்கள் நீங்கள்
இக்கணம் தொடர்ந்தே...

ஒட்டகங்களுக்கு விடுமுறை செய்தி
ஆனந்தக்கூத்து !

http://www.uyirmmai.com/Uyirosai/ContentDetails.aspx?cid=3005

நன்றி உயிர்மை.

மன்னிக்க!

2010-06-01T12:28:00.000+03:00

கண்ணீர்த்துளிகளின் மிச்சத்தில்
எரிவது என்னவோ
ஒரு நட்பின் ஈரமும்
ஒரு காதலின் எச்சமும்..

காது கேட்பவர்களில்,
சில காதுகள்
துப்பும் எச்சிலும்
திமிரும் புன்னகையும்
அசாதரண ஆறுதலும்,
நொடியின் பின்நொடியிலும்...
இமைகள் ஊமைப் பொழுதென
உயிர் தேடித் திரிவதாய்
தொடர்ந்து விக்குகிறது
கையூண்டு இதயம்..!

கவிதை யெழுதுவது என்னவோ
சிலருக்கு மட்டுமே
வாய்த்து விடுகிறதெனினும்
தலைப்பில் சிரமமேதுமில்லை
நடைபயில்பவர்களுக்கு!

அவள் எப்பொழுதுமே அவள் ,
எனக்குப் பந்து விளையாடுதல் பிடிக்கும்
நிறைவு!

http://www.uyirmmai.com/Uyirosai/Contentdetails.aspx?cid=2979

நன்றி உயிர்மை.

மரணம் பழகும் விரல்கள்..

2010-05-28T11:26:00.000+03:00

முதலாவதாய்
துவங்கிய கவிதை
அவள்!

வார்த்தைக் கோர்ப்புகள்
மட்டும்
கடைசியானபாடில்லை!

ஒரு குறிப்பிட்ட
மௌனத்தை
மௌனம் என்று
சாதாரணமாகச்
சொல்லிவிடுவதற்கு
தயக்கம் தடுத்துவிடுகிறது!

மழலைகளை
ரயில் தண்டவாளங்களைப்
போல கடந்துவிட முடிவதில்லை,
சேர்த்துக் கொள்ளலாம்
இனி அவளையும்
காதலையும்
அதனோடு!

http://youthful.vikatan.com/youth/Nyouth/arumugampoem240510.asp

நன்றி விகடன்.

மரணித்துவிடாத தற்கொலைகள் !

2010-05-24T18:35:00.000+03:00

பறவையின் நிழலில்
கரையொதுங்கிய வானம்
அவள் !

நிலவுப் பெருங்கடலின்
எதிரொளி வெளி
நான் !

மயானச் சதுக்கத்தில்
மனிதனெரியும் விறகு
காதல் !

விண்மீன் இதய ஓவியமும்
சூரியமுகப் பென்சிலும்
இடர்ப்பாடுகளில்
புனையாக்கடிதம்
அல்லது காகிதம்
கவிதை !

http://www.uyirmmai.com/Uyirosai/Contentdetails.aspx?cid=2953

நன்றி உயிர்மை.

காதல் மழை

2010-05-22T12:58:00.000+03:00

ஈர முத்ததினொரு துளி
மழையெனக் கசிய
பேசும் மௌனம்
பேசிக்கொண்டேயிருக்கிறது
மௌனங்களாகவே !

ஒரு காகிதத்தை
நிர்வாணப்படுத்திய
பெருமூச்சில்
உருகி வழிகிறது
என் காதல்
கவிதை வார்த்தைகள்
ஏதுமின்றி!

http://www.keetru.com/index.php?option=com_content&view=article&id=8830:2010-05-21-16-22-58&catid=2:poems&Itemid=265

நன்றி கீற்று..

நேசிக்கும் பெண்ணை ஆகாயத்திலிருந்து தூவுதல்..!

2010-05-17T21:15:00.000+03:00

நிசப்தத்தின்
பெருவெளி யெங்கும் வெம்மை...

ஒரு மரணம் தான்
கவிதைக்குக் காரணியாகத்
திணிக்கப்படுகிறதென்றால்
காதலை வெறுக்கத் துணிவதென்பது
இயல்பு மீறலல்ல!

மாற்றம் வரம்பு மீறி
அடுத்து இன்னொரு
கவிதையில்
உன்னை மழையெனலாம்
மறக்காமல் பெய்துவிடு!

நேசிக்கும் பெண்ணை ஆகாயத்திலிருந்து தூவுதலென,
மறந்தும்
எங்கும் எழுதாது
காற்றில் மடித்து
காகிதத்தின் கதவைச்
சாத்திவிடப் போகிறேன்.

நாளை உன் மழலை
விளையாட.. கப்பல்
தேவைப்படும்.!

http://www.uyirmmai.com/Uyirosai/ContentDetails.aspx?cid=2933

நன்றி உயிர்மை.

...................

2010-05-11T19:12:00.003+03:00

தழுவல்..
வியர்த்தல்..
வியத்தல்..
முறைப்படி..

மற்றபடி..
மறைத்தல்..
கலைத்தல்..

விருப்பம்..அல்லது..நிர்பந்தம்..!

யதார்த்ததை உள்ளங்கையில் சொருகிவிடுதலென..

2010-05-11T10:20:00.002+03:00

இத்தோடு..
முடியப்பெற்று விடுமெனதான்,
தகித்துக் கொண்டிருந்தது...
மௌன பீடம்.

சந்திப்புகளின் வாசமும்..
சிநேக கைகுட்டையும்,
எப்பொழுதுமே...
ஒரு நெருடலாகவே
அமிழ்ந்து விடுகிறது
எல்லோருக்குமான இதயத்தில்.

கனங்களும்..
கணங்களும்..
ஒருசேர நிர்ப்பந்தித்து வைத்திருக்கும்
மௌனபீடம் என்பது ..
அத்தனை சுலபத்தில்
உடைபடுவதானதாக அல்ல.

புரிதலும்..
புரிபடுதலும்,
எளிதேயெனும்
கோர்வையாயிருந்தால்..
அவள் உள்ளங்கையில்
சிவப்புபட்டிருக்கும்
அம்மருதாணி சிவப்பைப் போல
எவ்வளவு அழகானதாக
துளிர்ப்புறும்
இந்த வாழ்வென்பது.

http://www.uyirmmai.com/Uyirosai/Contentdetails.aspx?cid=2893

நன்றி உயிர்மை.

...................

2010-05-10T13:19:00.000+03:00

நிகழ்ந்து முடிந்தது மரணம்..
நட்சத்திரங்களில்லா வானம்
அழுக்கு!

எவருக்கும் புரிவதில்லை
அவளுக்கு மட்டும் புரிவதேயில்லை..

பனிக்காடு.

2010-05-04T13:09:00.000+03:00

நிலவறையில்
கடலுறங்குவதாக
எழுதிச்செல்லும்போது
கவிதையொன்றின்
சுவாசம் முட்டுகிறது !

இரண்டாம் பத்தி
இப்படிப்பிரிபடுகிறது
குளக்கரையில்
நிலவு துயிலுறுமாம் !

ஜீவநடமாட்டமேதுமில்லா
விழிகளிரண்டின்
மேற்பாகமுள்ள நெற்றிப்பொட்டில்
மாறி மாறி மீள்கிறது
மேகக்கூட்டம் !

மெல்லப் பனிவிலக்கி
அதிகாலைச்சூரியன்
ஆளெழுப்பும் பணியினை
நித்தமும் செவ்வனே செய்வதாகி
நிர்ப்பந்திக்கிறான் கடவுள் !

சாத்தானைச் சந்திக்கப்
புறப்படுகிறேன்!
யாரங்கே..?
திறவ கோலுங்கள்..
அவசரமாக வழி தேவைப்படுகிறதெனக்கு...

http://www.uyirmmai.com/Uyirosai/Contentdetails.aspx?cid=2864

நன்றி உயிர்மை.

எழுத்தின் வன்மம் .

2010-05-03T12:54:00.000+03:00

வாசித்திருந்த
புத்தகத்தை
சாத்திவிட்டு
சலனமின்றி தொடர்ந்தது
அதன் ஞாபகங்களில்
மனப் பக்கங்கள்.

ஒரு கட்டத்தில்
நான் தொலைந்த
அதே நிமிடத்தை தொட்டுவிட
நடப்பு நிமிடத்தில்
தொலைபட்டேன்.

ஒரு முறைக்கு
ஒவ்வொரு முறையும்
தாக்கிவிடுகிறான்
எழுத்துக்காரன்.

http://www.thinnai.com/?module=displaystory&story_id=31005022&format=html

நன்றி திண்ணை..

...................

2010-05-02T19:07:00.001+03:00

குறிப்பிட்ட..
இடமொன்றில்,
தீர்மானப்படுகிறது!
அவள் தீட்டாத ஓவியம்
மௌனமென்ற வரைபடத்துடன்.!

ரசிக்கும் காற்று
சிந்திச் செல்கிறது
இசையெனும் புள்ளியினை.!

தூர நின்று
கிளியின் வண்ணமொத்த
இலையின் பனித்துளி
வெட்கத்தை எழுதிச் செல்லும் பொருட்டு..

இக்கவிதை முடித்து வைக்கின்றது
முதல் முத்த ஞாபகத்தினை.!

இம்முறை கண்டிப்பாய் சொல்லப்பட்டிருக்கும் காதல்!

2010-04-30T08:52:00.000+03:00

சொல்லியே ஆக வேண்டும்!
எப்படி என்பதுதான்
இன்னும் பழகிவிட முடிவதில்லை..

இப்படித்தான்
என்றால்..
அப்படியில்லையே
அப்படி வேண்டாமே
அடிக்கடிச் சொல்லிக்கொள்கிறேன்
எனக்கு நானே!

எத்தனை முறை
ப்ராக்டீஸ் எடுத்துச் சென்றாலும்
ஒரு முறையும் சொல்லிவிடுவதாயில்லை!

அதே மாதிரியானதொரு
சொல்லாதச் சொல்லோடுதான்
நடை கொண்டிருக்கிறேன்
இம்முறையும்!

http://www.keetru.com/index.php?option=com_content&view=article&id=7420:2010-04-30-03-56-19&catid=2:poems&Itemid=265

நன்றி கீற்று..

நேசங்களின் கூவல்..

2010-04-27T12:15:00.000+03:00

பயணங்களில்,
பின்னிருக்கைகளின்..
தடம்பதிந்த வெற்றிலைச்சிவப்பில்
அடையாளப்படுத்தப்படும்
அவர்கள் முதியவர்களென..

வண்ணத்துப்பூச்சியின்
சிறகுகள் வளர்க்கும்
மழலைகளின் வயது கண்டு
தேடல்கள் தற்காலிகப்படநேரும்.

ஓரர்த்த ராத்திரியில்,
உயர உயரப் பறக்கும்..
எல்லோரையும் போல
எனக்கும் கனவுகள்..

நட்சத்திரங்களை வாசிப்பவர்கள்
இப்-போதைக்குக் குறைவென்றே
இருத்தல் கூடும்.

அவள் வராத வருகையை
சில பொழுதுகளில்
மழையுரைத்து நகர தீரும்!

நேசங்கள்..
நெய்திருந்த கவிதைகள்
நிரம்பி இசையும் காற்று வீசியதும்
முடிவுற்றிருக்கும் ஒரு மரணம்.!

http://www.uyirmmai.com/Uyirosai/ContentDetails.aspx?cid=2833

நன்றி உயிர்மை.

குறிப்பின் தொடர்ச்சி..

2010-04-25T11:50:00.001+03:00

கடைசி உரையாடலென கரைக்கப்பட்டிருந்தது ,
தேநீர் தீர்ந்தபின்னான கைக்குட்டையின் நுனியில்
ஒரு காதலும்
ஒரு நட்பும்
இரு மௌனமும்..!
அம்மேஜையின் விளிம்பில் இன்னும்
கேவிக்கொண்டிருக்கிறது கண்ணீர்துளியொன்று

கைகோர்க்க ஆளின்றி..

http://www.keetru.com/index.php?option=com_content&view=article&id=6895:2010-04-25-05-32-16&catid=2:poems&Itemid=265

நன்றி கீற்று..

...................

2010-04-22T19:53:00.002+03:00

அன்பின் ஆதாரங்களைத் திரட்டுதலில்,
கவனக் குறைவின் முரட்டுத்தனத்தில்..
பிய்ந்த எறும்பொன்றின் தலை,
மிகத்தெளிவாய்..

...................

2010-04-22T18:53:00.003+03:00

ஜன்னல்கள் திறக்கப்படுகிறது..
முன்னமே மழை தூறுகிறது..
அவள் வருவாளா !!

ஜன்னல்கள் அடைத்துக்கொள்ளப்படுகிறது..
மழை நின்றுவிட்டது..
வந்தவள் அவள் இல்லை !!

...................

2010-04-22T18:17:00.001+03:00

துண்டு வானமும் ..
சிமிட்டும் மீன்களும்..
இளைப்பாறும் கடலும்..
தனிமையின் இசையும்..

அரேபிய ராசாக்கள்..10

2010-04-19T20:20:00.004+03:00

பெருமழைக்குப் பிறகான கருத்த வானத்தைப்போலவோ..
பிரளயத்தில் இடம்பெயர்ந்த சிறுதவளையினை யொத்தோ..
ஒற்றைச்சலிப்பில் ,
உயிர் மறுத்தது.. மூச்சின் வெம்மையினை..!

பின்..
தனிமையின் ஜன்னலில்..
இரவை நெரித்து நெருங்குவதாய்
வரையப்படுகிறது இத்தாகம்..!

இப்பிரிவின் வலியென்பது..
மழலை புன்னகை பிரசவிக்க வாய்ப்புமறுதலித்த
விலையுயர்ந்ததொரு பொம்மையைப் போன்றதென
அறிந்திருக்காமல் விட்டிருந்தேன்
விமானத்தில் பறத்தலின்போதோ !!

கடந்த முழுஆண்டு தாகத்திற்குக் கிடைத்த
கொழுத்த இரையாக ..
சொல்லொலி முத்தங்கள்!
இவ்வரேபிய அறைமுழுதும் அலைந்தாடுகிறது
மூச்சுவிட நேரமற்று ...!!

வாங்கித்தரா புதுகொலுசைக் காரணங்காட்டி
இன்றிரவும் அவளுடன் பிறந்தநாள் கொண்டாடலாமென..
வெளிச்சத்தின் மிகக்குறைந்த ஒளி ,
தொலைபேசியிலொரு பூங்கொத்தையோ
கிறுக்கல்கள்மொழியுடன் கூடிய கடிதத்தையோ
நிரப்பிவிட்டு நிசப்தமாகிறது..!

http://www.uyirmmai.com/Uyirosai/Contentdetails.aspx?cid=2808

நன்றி உயிர்மை.

கவன குறிப்பெடுத்தல்..!

2010-04-19T12:03:00.000+03:00

நீலம், மஞ்சள், கரும்பச்சை...
நிற உடையணிந்த குழந்தைகளில்சில
பால்-ஐஸ் விளையாட போகுமுன் ,
அதிலொரு குழந்தை உன்னை சேர்க்கவும்..
மற்றொன்று வேண்டாமெனவும் கையசைக்க..
எப்பக்கம் உன் நகர்தலிருக்கும்.?
நீ இப்போ சொல்வாயானால்..
உன் வயதொத்த பலர்
பால்யவாசத்தில் மூச்சு முட்டக்கூடும்..!

http://www.thinnai.com/?module=displaystory&story_id=31004186&format=html

நன்றி திண்ணை..

பொம்மைக்கவிதைகள்!!

2010-04-15T11:49:00.000+03:00

மழலைகளின் புன்னகை கண்டு
பாலையெங்கும் பொம்மை சொட்டும்
அதீத அற்புதமுண்டு !

மழலைகளின் அழுகை
பல்லாயிரம் தோல்வி பொம்மைகளை
நிர்மாணிப்பதும் உண்டு !

ஒரு வீட்டில் கண்டது!
அண்ணன் ஒழிக்கிறான்
தங்கை அழுகிறாள்
மூக்குச்சப்பிய பொம்மை ரசிக்கிறது !!

முத்தமிடும் குழந்தை
முத்தம் கேட்கும் குழந்தை
பரிசு பொம்மை
எவை அழகு !

பல்முளைக்கா மழலை
பாடும் பொம்மை
இரண்டும் அழகு !

குறிப்பாக இதைச்சொல்லியாக வேண்டும்
குழந்தைகளும் பொம்மைகளும் ஒன்றென
நிச்சயிக்கும் வண்ணம்
உடைமாற்றி ரசிக்கின்றனர் பலர் !

வயிறு தள்ளாது
குழந்தை பெற்கும்
பொம்மைக்கவிதை அழகோ அழகென
யாரோச்சொல்வது
ஷ் ஷ் ஷ்.. ரகசியம்.. !!

http://www.keetru.com/index.php?option=com_content&view=article&id=5743:2010-04-15-03-51-04&catid=2:poems&Itemid=265

நன்றி கீற்று..

ஓர் யுகத்திற்கான கனவு..

2010-04-12T20:58:00.001+03:00

சற்றும் எதிர்நோக்கவில்லை
சடாரென கடந்திருந்தது
துளியென அவ்வொலி..

சுதாகரிப்பின்முன்
காலியாகியிருந்தது அந்நிமிடம் !

மிகநீண்ட மௌனம்..
ஒருவித மென்மயக்க இசையை
நெகிழ்ச்சியுடன் மீட்டுவதாய், அவள்
புன்னகைக்க தயார்படுத்துகிறாள் தன்னை..!

தேநீரின் சிணுங்கலில்
வெட்கம் தாங்காது மாலை
இனிப்புறுகிறது !!

சற்றும் எதிர்நோக்காத
அவ்வருகைக்கான காத்திருப்பு,
மூச்சுக்காற்றில் உவகை
உமிழ்ந்த வண்ணம்...........
ஓர் யுகத்திற்கான கனவை,
காதலென அரிதாரம் பூசி..
ஆர்ப்பாட்டத்திருவிழா துவக்குவதாய்
பெருத்த மழைக்கு தயாராகிறது வானம்.. !

http://www.uyirmmai.com/Uyirosai/Contentdetails.aspx?cid=2759

நன்றி உயிர்மை.

அப்பாவின் கண்கள் நனைந்திருந்தன

2010-04-12T12:30:00.000+03:00

மிகைப்படியான யோசித்தல்
ஒருசில சமயங்களில்
ஒன்றும் புரிபடுவதில்லை..

அப்பிஞ்சு பள்ளி சிறுமியையும்
பட்டம் நோக்கி ஓடிகொண்டிருந்த
வால் சிறுவனையும் அழைத்து
"தன் நீலநிற புதிய பீ-எம்-டபுள்யு" வினில்
ஊர்சுற்றி வருவதாக சொல்லிச்சென்றவன்
இன்னும் வீடு திரும்பவில்லை..

மூவரும் இணைந்து விளையாடும்
புகைப்படமொன்றின் கதவு
அவரை வெறித்து நோக்கியது ..!!

மிகைப்படியான யோசித்தல்
ஒரு சில சமயங்களில்.....

http://www.thinnai.com/?module=displaystory&story_id=31004113&format=html

நன்றி திண்ணை..

..................

2010-04-09T08:02:00.000+03:00

சொல்லொலி முத்தங்கள்
அறைமுழுதும் அலைந்தாடுகிறது
மூச்சுவிட நேரமற்று..
வாங்கித்தரா புதுகொலுசை காரணங்காட்டி
இன்றிரவும் பிறந்தநாள் கொண்டாடுவோமா..

மரணத்தில் நனைதல்..

2010-04-05T19:43:00.001+03:00

தாடி மழிக்கும் நேரத்தில்,
நேற்றைய அணைப்பில்
கழன்டோடிய பொத்தானை மீட்டெடுத்து
அதனுள் பொதிந்துவைத்திருப்பாள்
ரகசிய முத்தமொன்றை அப்பெண்..!

அலுவல் சென்று திரும்பும்வரை
இருவர் மண்டைக்குள்ளும்
ருசி கொண்டிருக்கும்
அவ்விடைவெளி முத்தம்..!

டிபன்பாக்ஸின் சப்பிய வலதோரத்தில்
அவளுக்கான பருக்கைகள் ஒட்டிக்கொண்டிருந்ததை
எப்படியும் இரவின் புணர்தலில்
உச்சந்தலையில் நனையும் முத்தத்தில்
முனகி வைப்பாள் !

பின்பொரு அகாலத்தில்
அப்பெண்ணின் முதுகு மச்சத்தில்
மிச்சப்பட்டிருப்பேன் நான்
அவளறியாது !!

http://www.uyirmmai.com/Uyirosai/Contentdetails.aspx?cid=2730

நன்றி உயிர்மை..

தனிமை விழுங்கும் தோல்வி.!

2010-04-02T16:01:00.000+03:00

"யாருமில்லா இடமொன்றில்
ஓவென்று அழுவதாய்"
தொடங்கும் பாடலொன்றிலிருந்து
நைசாக நழுவுவதென
வேகமாக வந்துவிடுகிறார்கள்..

நெடுநேரம் பேசுகிறார்கள்,
நட்பின் கை கொண்டு
காதலின் தோள் பற்றியேறி
காமத்தின் கதவு முன்நின்று
ஏனோ உள்செல்ல தயங்கி
மௌனமாக திரும்பி விடுகிறார்கள்.!

பின்னொரு நாள்
சம்மதமேதுமில்லாத
நம்பிக்கை மனிதர்கள்
நைசாக தட்டிவிடுகின்றனர்,
ஒலிக்கத்துவங்குகிறது..
"யாருமில்லா இடமொன்றிலென துவங்கும் பாடலொன்று.."

http://www.vaarppu.com/view/2133/
நன்றி வார்ப்பு..

ரகசிய வாசல்

2010-04-01T19:01:00.000+03:00

மழை பொழிகிறது
ஜன்னல்கள் திறக்கப்படுகிறது
பின், ஈரக்கூந்தல் வானமாகவும்
அவன் பார்வை நட்சத்திரங்களாகியும்
பறந்திருக்கக்கூடும் இந்நேரம்
யாரும் காணா இடம்,
ரகசிய வாசல்
காதலர்கள் அறிவார்கள்!!

http://www.keetru.com/index.php?option=com_content&view=article&id=5060&Itemid=139

நன்றி கீற்று..

மரணத்தின் வெக்கையிலிருவர் !

2010-03-26T09:58:00.001+03:00

குறிப்பு,
நிகழ்வென்றால் நிகழ்வு,
கவிதையென்றால் கவிதை .

இருவர் பேசுகிறார்கள்,
நினைவுகள் பூத்திருக்கும்
பூந்தோட்டங்களை நாடிச்செல்வதில்லை
மாலைவேளைகளும் கொடுமனமும்.
வரிகளெதுவும் இருந்துவிடாத
மொழியில்லா இசையையே
பற்றிப்பிடித்திருக்கிறது இரவுகள்.
மழலைகளை கடக்கநேரும் பொழுதுகள் மட்டும்
எத்தனை தடுத்தும்
நம்மையும் கடந்துவிட நேர்கிறது.

காதல்வலியில் யாரோ அவர்கள்
எழுத மறந்ததெல்லாம்
யாருக்காகவோ ஞாபகப்படுத்தப்படுகிறது!

அலைப்பேசி..

2010-03-24T13:03:00.004+03:00

வெட்கம் கசங்கிய
பின்மாலையில் பத்திரப்படுத்திவைக்கலாம்
விடுபட்ட வெட்கங்களை..

அல்லது..

வெட்கம் கசிய
முன்னிரவில் முத்தங்கள்
கோர்த்திசையலாம்..

இரண்டுமே ஒன்றாயின்..
அறிந்தவர்கள் அறிந்திருக்கலாம் ,
நீரை யாமாற்றும் தக்கைபோல்
காதலை யாமாற்றும் கருவியுமென!
பின் நவீன யுகத்தில்
இவ்வியாபார அலைப்பேசியினை..

http://www.keetru.com/index.php?option=com_content&view=article&id=5025:2010-03-30-04-41-47&catid=2:poems&Itemid=265

நன்றி கீற்று..

ஆகாயத்தில் பொம்மைகள் !!

2010-03-23T22:58:00.001+03:00

விளக்கணைக்காமல் உறங்கும் வானம் !
நட்சத்திரங்கள்னாலே ரசனைக்கும் ரசிக்கவும் தானே ?
இப்போ என்ன ஸ்பெஷல்..??
இது "ஆகாயத்தில் பொம்மைகள்" யென்பதற்கான நட்சத்திரங்கள்!!
சரி, அழைத்து வரப்போவது யார் ?
ஆணா - பெண்ணா ?
ஷ்ஷ்.. அவள் கனவிலிருப்பாள்
நானே நகர்கிறேன்..

ஆமா, அவள் எத்தனை முறை கெஞ்சியிருப்பாள் ?
எத்தனைமுறை ??
ப்ச்.. துல்லியமாக ஞாபகமில்லை,
பட்.. எழுதவும் எதுவும் தனித்து தேர்ந்தெடுப்பதில்லை அவளை,
அதனாலோ என்னவோ எழுதவுமில்லை !!

வானத்தில் பத்திரப்படுத்திய
கை நிறைய விளக்குகளோடு
வீடு சென்றுகொண்டிருக்கிறேன் இப்போ..

என்ன ஆச்சர்யம்!!
பயத்திற்கு மாறாக, இம்முறை அவளும்
விழி நிறைய வின்மீன்களை பெற்று வைத்திருக்கிறாள்!
ஆமாங்க, புது கல்யாணம்,
அதுவும் காதல் கல்யாணம்..
முன்னெப்பொழுதும் அவளிடம்
பட்டாம்பூச்சிகளையோ..
ஹைகூ ஜன்னல் மழையையோ தான்
பரிசாக தந்திருக்கிறேன்.
இம்முறை, பொம்மை தரலாமென நெளிகிறேன்.......
அவளும் இறுக்கமாக கட்டிக்கொள்கிறாள்!

பகிரங்கமாக அறிவிக்கப்பட்ட தோல்வி !

2010-03-18T22:07:00.003+03:00

மற்றவைகளிலடங்கும் போதையெனில்,
காகிதப்பூவையோ
கழிவறையையோ
அண்டியிருக்கலாம்..

வெங்காயக்காதல்,
கண்ணீரிடம்தான் மடலாடல்,
மீதிவரிகளுக்கு..
அவளிடம் விருப்பமேதும்
அறிகுறியில்லாபட்சத்தில்
முடித்து வைக்கிறேன்
தோல்வியின் புள்ளியை.!

http://www.thinnai.com/?module=displaystory&story_id=31003194&format=html

நன்றி திண்ணை..

முழு நீண்ட காத்திருப்பு

2010-03-15T17:01:00.000+03:00

இசைக்கும்
இரைச்சலுக்குமான
மிகமெல்லிய வெளியில்,
விட்டுக்கொடுத்தலுக்கும்
விட்டு விலகுவதற்குமான
உடன்படிக்கைகள் கையெழுத்தாகின்றன

நேசங்களின்
பொன்முட்டைகள் அறுபட்டு,
இறைந்து ஊர்கிறது
காற்றெங்கும் புரிதலின் தோல்வி

இயலாமையில் இலைகள்,
காய்ந்து சருகாகி
தெருவெங்கும் சுற்றி நடப்பதுபோல்
உபயோகமில்லாத நினைவுகளோடு
வெறுமனே நகர்கிறேன்

வினவுதலில்லாத பதில்களிடம்
தோற்றுப்போகும் வினாக்களிடமிருந்து
புரிதலை எப்பொழுதுமே
ஒற்றைப்படுத்த,
காலம் தயாராகவே!!

http://www.keetru.com/index.php?option=com_content&view=article&id=4801:2010-03-15-10-02-54&catid=2:poems&Itemid=88

நன்றி கீற்று..

அவர்கள் காதலிக்கட்டும்..!

2010-03-13T15:08:00.000+03:00

தேவதைகள் காதலிப்பதில்லை..
நீ தேவதை அல்ல..
கழுத்தோரம் முத்தப்பந்தலிடுகிறாள்
காது திருகி ,
செல்லம் கொஞ்சுபவன்
சிணுங்கி மீள்கிறான்..!

வெட்கங்கள்..
இசை மீட்டும் ,
அவ் - அந்தி மைதானம்
மழையின் ஆசிர்வாதம்..!

காதல் பரிசுத்தம்..
காமம் குடைவானம்..
மெல்ல படையெடுக்கும்
மின்மினி விண்மீன்கள்..!

அம்மா பின்தொடரும்
தவழும் பிள்ளைக்கு..
சோறூட்டும் வட்டநிலா ,
மொட்டைமாடிக்கு வெளிச்சமூட்டும்
காதல் சில்மிஷங்கள்..!

அதோ அந்நீண்டதெருவின்
பச்சைநிற கதவு வீட்டிற்கும்
பழுப்படைந்த ஜன்னல் குடிசைக்கும்
இக்கடிதம் செல்வதெப்படி.?
அவர்கள் காதலிக்கட்டும்..!

http://www.thinnai.com/?module=displaystory&story_id=31003122&format=html

நன்றி திண்ணை..

மாலுமி என் அண்ணன் மட்டுமல்ல..!

2010-03-08T14:03:00.000+03:00

கொடூரமாய் தீர்ந்த
கொலைகார மழையில்
முங்கிய நகரத்திற்கு பின்னோடிய
மும்பையை..

மீன்கூட்டங்கள் கண்ணாமூச்சாடிய
மணற்-அலை காதல்கள் நெளிந்த
மெரினாவைத் தின்று சுவாசித்த
பேய்ச்சுனாமியை..

முந்தாநாள்
முழுங்கிய ராசப்பனை
இன்னும் துப்பிவிடாது
இறகு விரித்திருக்கும் ஏரியை..

அம்மா விழிகளை
அவளறியாது விலகிய
குழந்தையொன்றின் விரல்களை
குறிப்பெடுத்த வெந்நீரை..

இதுபோல்..
அதுபோல்..
நீரின் தன்மையை
உவமைப்படுத்த ஒருபோதும்
உந்தாது மனப்பருந்து ,
கடலொன்றின் நடுநாவில்
காய் நகர்த்தும்
என் அண்ணனைப்போலுள்ள
கப்பலோட்டிகளை
கவனிக்கும் பொருட்டு ...

http://www.keetru.com/index.php?option=com_content&view=article&id=4642:2010-03-08-07-11-03&catid=2:poems&Itemid=88

நன்றி கீற்று..

( அண்ணனுக்கும், கடல் சார்ந்து தொழில் செய்பவர்கள் அனைவர்க்கும் )

காதலின் பெயர் பரிசீலனையில்..

2010-03-06T18:29:00.000+03:00

பனியும் இலையும் பூத்திருந்த
அதிகாலையொன்றில் குழுமியது
நிரம்பி வழிந்த காதல்..

தொடர்ந்த நாழிகைகளில்
ஏதேதோ நிரம்பியும்
எதிர்வீட்டுக்குழந்தைகள்
மஞ்சள்டிரவுசர் அணிந்திருந்த
அப்பொம்மையை மீட்டியதும்
எழும்பிய அக்கீச்சொலியில்
முற்றமிட்டது மிதமிஞ்சிய காதல்..

இப்படியாக ..
விட்டுக்கொடுக்கப்பட்டிருந்த காதலில்
அதோ, தலைகாட்டாமல் சிரித்துச்செல்லும்
அப்பெண்ணும் மறைமுகப்படுகிறாள் !

http://www.thinnai.com/?module=displaystory&story_id=31003054&format=html

நன்றி திண்ணை..

நிரம்பி வழியும் இசை..!

2010-03-01T11:13:00.000+03:00

காற்றைக் கீறி
இசை பிளியும்
மூங்கில்கீற்று ஸ்பரிசத்திற்கு
பயணப்படுபவளின்
துப்பட்டா வாசமுகர்ந்து
பின்தொடரும் அவ்வொருவன்,
இம்மழை இரவில்
அழகிய பாடலொன்றை
காமம்பொதித்து பதிவிட்டிருப்பான்,
அப்பெண் இசைகோர்த்திருக்கக் கூடும்!

http://www.keetru.com/index.php?option=com_content&view=article&id=4417:2010-03-01-07-33-31&catid=2:poems&Itemid=88

நன்றி கீற்று..

துளி விஷத்திற்கான விலையொன்றும் அதிகமில்லை..

2010-02-28T09:04:00.000+03:00

பூக்கள் கல்லறைகளுக்கெனவும்
பூத்துக்குலுங்குகின்றன
அஸ்தம வானங்களில்..

முன்னோக்கி உந்த
வாய்ப்பு மறுதலிக்கப்பட்ட வண்ணம்
சிவந்த ஒளிமுன்
சாலையில் துவங்கிய
அலுவலக காலை,
முன்னெப்பொழுதும் போலில்லாது
பேசி தீர்ப்பதற்கென
அவர்கள் பரிமாறிய சொற்வீசல்கள்
இன்னொரு அவர்களுக்கொன்றும்
புதியதாய் அமைந்துவிடுவதில்லை..

நேற்றைய ஷாலினியின் ரெட் டாப்சும்
இன்றைய கிஷோரின் புளூ ஜீன்ஸுக்குமாய்
வழக்கத்தை புறந்தள்ளி
சுவாரசியமாய் நகர்கிறது நண்பகல்..

பல பகல்கள்..
இன்னும் தெரிந்திருப்பதில்லை,
சிறுதுளி விஷமொன்றின் காத்திருப்பில்..
மறுதலிக்கப்பட்ட காதல்களும்,
அவைகளுக்குப்பின்னால்
கிஷோரும் ஷாலினியும் போல
பலபெயர்களும் கசிந்து கொண்டேயிருக்குமென!!

பூக்கள்..
கல்லறைகளுக்குமென,
மெல்ல நகர்கிறானொருவன்.

http://www.thinnai.com/?module=displaystory&story_id=31002273&format=html

நன்றி திண்ணை..

காரணங்களற்ற புரிதல்கள்..

2010-02-24T08:16:00.001+03:00

காற்றைப் புறந்தள்ளி நகர்ந்தோடும்
துண்டு பேப்பரொன்றின் பின்பாக
விழாமல், வீதியில் குழந்தைகளிரண்டு..
சாக்கடைக்கு கொஞ்சம் முன்பு
நீலச்சட்டை பையன் முந்திகொண்டான்,
பச்சைபாவாடை தங்கச்சி அழுமுன்
ரஜினிகாந்த் சிரிப்பு மூட்டினார் , அண்ணனுக்கு
சிவாஜியின் கட்டபொம்மன் தலைதான் வேணுமாம்..

ஒற்றுகேட்டு கொண்டிருப்பவன் சொல்கிறான்,
மாடிவீட்டு பிள்ளைகளுக்கு
ரஜினியின் பிய்ந்த உதடுகளையும்
சிவாஜியின் தலைதுண்டுகளையும்
கம்ப்யுட்டர் கேம்ஸ்ல
ஒட்டி விளையாடத்தான் பிடிக்குமாம் !

http://www.keetru.com/index.php?option=com_content&view=article&id=4117:2010-02-24-03-56-38&catid=2:poems&Itemid=88

நன்றி கீற்று..